E proyeccionnan cu Banco Central di Aruba a caba di publica den su Economic Snapshot di e siman aki, tabata un adaptacion considerable compara cu e proyeccion duna mas tempran e aña aki den su Economic Outlook na februari.
Esaki ta expresa e actual optimismo mirando e actividad economico te awor e aña aki, cu mayoritariamente ta refleha e situacion den sector turistico. Bon Dia Aruba a pone e anterior proyeccionnan conoci, di presupuesto 2021, di Departamento di Asunto Economico (DEACI), di Banco Central y IMF hunto, añadiendo e proyeccionnan nobo di CBA, y calculando cuanto e GDP nominal lo ta pa 2021, a base di e proyeccionnan basico, optimista y pesimista di CBA.
Layout please pone tabel aki
Por observa cu e proyeccion base nobo di CBA ta na mas o menos mesun nivel cu e proyeccion optimista di DEACI, cu tabata esun mas halto te awor. E proyeccion pesimista di CBA, a base di un crecemento di 8,2%, ta na mesun altura cu e proyeccion base di DEACI. E proyeccion optimista nobo di CBA (15%) ta duna e GDP mas halto di tur proyeccion te awor: Afl. 5161 miyon. Si esey keda realiza, anto nos GDP lo bolbe na mas o menos 87% di loke GDP 2019 tabata.
NB: E cifranan nobo ta calcula a base di e GDP nominal 2020 di Banco Central den su Annual Statistical Digest 2020 (Afl. 4469 miyon).
Motibo pa revisa presupuesto 2021?
Por mira tambe cu e cifranan di crecemento economico riba cual presupuesto 2021 ta basa, a keda bastante aleha di e cifranan cu a ser publica despues. Esey ta conta tambe pa e GDP 2020 cu a tuma como base e suma di Afl. 4049, cu despues tur otro instancia tabata mira mas halto. Revision di e cifranan di GDP lo supone mas entrada for di economia pa gobierno, pero cautela lo por keda e consigna pa e gabinete nobo. Gobierno tin anualmente alrededor di 22 – 23%% di GDP nominal como entrada total. Na un GDP sustancialmente mas halto esaki por significa extra ingreso di mas di Afl. 100 miyon.
