(NLTimes)—Un video nobo comparti cu gruponan di Telegram ta mustra un otro incidente di proyeccion di laser cu lemanan racista of antisemitico riba un edificio na Hulanda. E incidente mas recien a sosode diamars mainta trempan, ora cu e mensahe “Love and Make White Babies” a wordo proyecta riba e stacion di energia Hemweg na e districto di Westelijke Havengebied na Amsterdam, segun Parool.

Ademas, E frase “RIP Dresden” tambe a wordo proyecta riba e edificio. E corant a nota cu dia 14 di februari ta marca e 78 aniversario di e campaña di bom na Dresden, Alemania, pa aliadonan Mericano y Britanico. Miles di bom a cay den e ciudad Aleman, cubriendo 6 kilometer cuadra di e centro. Tambe e aliadonan a organisa 4 diferente atakenan cu a resulta den e morto di 25.000 persona entre 13 y 15 di februari, 1945.

E operador di e planta di energia, Vattenfall, no lo confirma e incidente na Parool. Un vocero di e compania Sueco a bisa cu e compania ta “distancia su mes for di e mensahe cu a wordo proyecta riba nos stacion cu no ta den servicio mas.” E vocero tambe a bisa, “nos a informa polis di esaki, y nos lo sigui controla pa esaki no pasa atrobe. Si e tabata proyecta, ta parce cu esaki a bin for di e highway, pues for di un luga pafo di e tereno.”

Cuerpo policial di Amsterdam ainda no a haci ningun declaracion riba e asunto aki.

E incidente aki ta e di 4 caso conoci unda cu a uza un proyeccion pa mustra texto controversial di nacionalistanan Derechista extremista. Un incidente famoso cu a pasa a wordo publica siman pasa unda varios video tabata mustra un proyeccion riba e cas di Anne Frank. Den un di e videonan, e mensahe tabatin e intencion pa propaga un teoria di conspiracion pa balota e autenticidad di Anne Frank su diario. E teoria ta bisa cu e diario a wordo skirbi cu un balpen, cual no a bira popular te cu despues di e Segunda Guera Mundial. E teoria aki ta wordo uza frecuentemente pa purba demostra cu e Holocaust nunca a sosode, of cu esaki a wordo exagera.

E alcalde di Amsterdam, Femke Halsema, a bisa cu e incidente tabata un acto di “puro antisemitismo” y “un atake riba e legado di Anne Frank.” Tambe el a añadi cu e acto tabata “hopi cobarde y doloroso pa e sobrevivientenan, e famianan di e victimanan di e Holocaust, e comunidad Hudiu y tur hende cu sa na unda odio, racismo y intolerancia ta caba.”

Mensahenan cu conexion cu gruponan Neo-Nazi na Merca y e movemento di White Lives Matter tambe a wordo proyecta riba e brug di Erasmus na Rotterdam durante e celebracion di aña nobo. E incidente cu a haya menos atencion a sosode prome cu aña nobo na Venlo, unda mensahenan similar a wordo proyecta riba varios edificio den e ciudad.