Aña pasa dia 1 di november minister di Naturalesa, Ursell Arends a lansa e proyecto di agroforesteria sintropico y a lansa e plataforma cu a duna oportunidad na e scolnan basico pa registra y participa na e proyecto aki. Dia 18 di januari ultimo a traves di un conferencia di prensa minister Arends a anuncia e inicio oficial di e proyecto.
E proyecto di agroforesteria sintropico ta un proyecto unda e scolnan cu ta participa ta ricibi sosten tanto for di Santa Rosa Aruba y Living Soil Aruba, como tambe for di Gobierno di Aruba pa desaroya un hardin cu ta provee alimentacion y asina inculca e balor pa agricultura den e futuro generacion pa medio di tecnicanan sostenibel.
Na mei di 2022 Living Soil Aruba a realisa un di e prome proyectonan di agroforesteria na Prinses Amalia School. Minister Arends a bishita e proyecto y a expresa cu esey ta loke tur e scolnan basico na Aruba tin mester y aworaki e proyecto di agroforesteria sintropico na scolnan basico ta un realidad.
Diasabra 20 di januari e prome scol basico, Scol Basico Washington, a ricibi su hardin di alimentacion y for di e dia ey, riba diferente diasabra den e lunanan cu a pasa e scolnan cu a registra y a keda seleccion a ricibi nan hardin di alimentacion tambe, te cu ya e prome scolnan por a mira fruto di nan hardin.
Un total di 13 scol ta forma parti di e proyecto aki, 13 scol basico y tambe IPA. E scolnan basico cu ta participa den e proyecto di agroforesteria sintropico ta Scol Basico Washington, Scol Primario Kudawecha, Colegio Hilario Angela, Colegio Conrado Coronel, Pius X School, Scol Caiquetio, Sint Paulus School, Play2Whizz Campus, Scol Basico Dornasol, Scol Paso pa Futuro, Mon Plaisir School y Grof Van Zinzendorf.
Diasabra 18 di mei binidero Scol Basico Dornasol ta bira e siguiente scol cu ta bay ricibi su hardin di alimentacion. Pa logra esaki boluntarionan ta un clave importante y comunidad di Aruba por inscribi pa yuda Scol Basico Dornasol logra su meta y cuminsa cu nan hardin di alimentacion.
