Directiva di Lotto pa Deporte lo cambia pa October

Ningun momento e proximo Minister di Enseñansa a insulta docentenan. Es mas, e ta cla pa sinta y scucha di nan pa asina hunto por logra e miho pa enseñansa. Asina Endy Croes a bisa Bon Dia Aruba.

Endy Croes ta un di e Parlamentarionan mas vocal di fraccion di MEP pero e ta consciente cu su papel awor ta bay cambia.

“Como Parlamentario, e ta un funcion respeta cu ta hopi oportunidad pa trece cambio y control a Gobierno y awor despues di un eleccion democratico, m’a haya e oportunidad di sirbi pueblo di Aruba den otro funcion. Y e biaha aki como Minister di Enseñansa y Deporte.”

Croes a bisa cu e ta preparando pa e funcion y locual lo dedica hopi tempo na dje, ta cu “mi ta sinti cu mi tin e parti ey den mi, cu ta e habilidad pa scucha. Mi lo scucha hopi di e veld, den tur sentido di palabra. Nos lo percura cu nos oido ta cerca di e personanan den e tereno aki y cu bon experto rond di mi, lo mi sa di tuma e miho decisionnan. Pasobra si ta un cos cu tur hende kier y mi ta kere den dje tambe, ta miho educacion pa nos pais. Brinda oportunidad na muchanan pa nan por tin educacion, pa nan por bay scol, ricibi enseñansa di calidad. “

Combinacion deporte

Y e combinacion di e cartera di enseñansa cu deporte ta ideal pa Endy Croes. “Hunto cu deporte nos lo haci algo hopi bunita. Tin hopi idea bunita caba cu nos ta pensando den e ultimo dianan aki, cu nos ta bay trece dilanti, treciendo deporte hopi na scol, klas 4, 5 y 6, treciendo competencia, treciendo e tipo di union aki bek.” Den su concepto, deporte ta forma caracter y brinda disciplina cerca muchanan tambe. Pues Croes a bisa cu e ta completamente prepara pa e tarea su dilanti, lo usa e oidonan pa sa kico realmente ta e dolornan y hunto lo por yega na solucion. “Y si mester haci cambio, tin e Plan Nacional di Enseñansa, 2030 cu ta un guia hopi hende a traha riba dje. Nos lo mantene riba e liña memey pa asina por tin e draagvlak di tur hende y lo contribui mas hopi posibel na bienestar general y enseñansa en particular.”

Shouro

Riba e pregunta si Minister Endy Croes lo evita di usa palabranan insultante manera ‘shouro,’ cu algun docente a sinti cu tabata dirigi na nan, Croes a bisa mesora cu nunca el a usa e palabra ey pa referi na docentenan. Berdad el a usa e palabra pero segun e, nunca el a us’e pa insulta docentenan. Tabata na principio di November 2020, cu sindicatonan SADA, SPA y SIMAR, hunto cu miembronan a exigi cu Gobierno para e recorte riba nan salario y beneficionan. E tempo ey, Parlamentario Croes a bisa cu “tin sindicato no tin e minimo sentimento humano kico esaki ta significa. Nan kier bringa pa nan propio cartera y kier crea destabilisacion den un pais pa sirbi agenda di oposicion.” Croes a specifica e actitud di Presidente di SIMAR y di SPA, bisando cu nan a mustra nan color politico. “Nada contra, pasobra tur hende ta liber pa expresa nan opinion. Nos ta respeta esey tambe.” Pero ta e forma con nan a protesta, cu a molestia Croes. “E manera hastro cu sindicatonan a yega Bestuurskantoor y exigi sin ningun tiki respet pa Prome Minister sali di un reunion di Crisis Team pa bin atende un poco ‘shouro’ cu kier papia di placa ta condenabel,” Croes a bisa na November.

Y e no ta lamenta e palabranan, pasobra el a usa nan cu un proposito. “Mi nunca a usa e palabranan contra sindicatonan, pero no docentenan,” Croes a bisa e siman aki. “Pero den politica tin diferente rol pa hunga. Duna respet na un cuerpo di enseñansa ta diferente cu e rol cu mi tin den Parlamento. Nos mester a mustra, y mi tabata hopi fuerte den esey, e desaster financiero cu AVP a haci. Y mi a percura cu mi por a ilustra cu documento.” Awor aki cu e ta bay asumi e cargo di Minister, un ehecutivo, e tin cu asumi otro papel. “Mi tabata ehecutivo den pasado, cu tin cu anda diferente. Esey no kiermen cu bo no ta papia. Ta papia na otro manera.” Croes a bisa cu el a haya educacion na cas pa duna respet pa ricibi respet, y es ta e rol di politica. Pero awor aki, den e cartera cu e ta asumi, mester di primordialmente paz y trankilidad. Esey lo ta su guia. “Y con ta yega na esey? Door di scucha nan, laga nan bin cu nan idea, y hunto wak e liña memey pa cana, na bienestar di enseñansa den e caso aki.”

Habri pa critica

Endy Croes a bisa cu como Minister e lo ta habri pa critica, cu no ta straño p’e. “Segun mi, mi ta e Parlamentario cu a haya mas critica tur dia. Nos mester ta habri pa esey. Mi por anda bon cu critica. Pero si mi ta mustra den mi trabou, hecho y logro.” Croes a bisa cu el a demostra esey den henter su carera como profesional y como deportista y dirigente deportivo, tambe riba plataforma internacional. “Unda cu mi a traha ma percura pa mi por a laga algo bunita atras, a pesar di poco critica, kizas door di celos. a cu no tur hende ta gusta mi.” Consecuentemente e ta prepara pa tuma e mesun actitud den su proximo responsabilidad, unda e lo hinca tur su energia pa cumpli cu e mandato di pueblo. “Pueblo lo sa di recompens’e of cambia bon a final di dia.” Croes a bisa cu hopi hende no conoce otro cu su rol di Parlamentario. “Hendenan cu conoce mi sa cu mi ta un hende humilde, cu ta gusta hari, y ta scucha, hende cu ta gusta amistad y asina lo hiba e proximo cuater añanan.”

Lotto pa Deporte

Endy Croes tabata Presidente y Director di Lotto pa Deporte. a di tur acusacion di mal maneho, Ministerio Publico nunca a presenta cargonan contra e Parlamentario. Y awor e ta bay ta e ehecutivo cu tin supervision riba Lotto pa Deporte. Minister Dangui Oduber tabatin asina hopi critica riba Lotto, cu te hasta el a menasa di lanta un loteria pa deporte nobo. Motibo ta cu segun Oduber, Lotto no tabata contribui suficiente na Deporte y e Directiva no tabata traha na interes di Aruba en general. Di su banda Endy Croes ta sigura cu denter di un luna despues di ta Minister, lo cambia Directiva di Lotto pa Deporte. “Tin trabou pa haci. Pa cuminza mester cambia directiva. Y mi por sigura bo, pa October tin directiva nobo. Kere den mi palabra. Nos lo haci’e diligentemente.”

Croes a splica cu e directiva actual ta uno cu ta sinta desde 2009, cu ta 12 aña. “Esey riba su mes no ta sano. Esey ta e prome paso pa tuma.” E di dos paso ta pa reuni cu e doñonan di Lotto pa Deporte cu ta Canadian Bank Note Company. “Mi conoce e compania bon. Mi a traha ocho aña cu nan. Ademas di loteria, nan ta traha paspoort rond mundo, nan ta imprenta placa pa diferente pais y un di nan tecnologianan ta loteria. Nan ta traha cu como 80 pais rond mundo.” Croes ta kere cu un bon acercamento, despues di cambia directiva lo ta un paso den bon direccion. “Tempo cu ami a drenta Lotto na 2001, ma haya un luga cu tabata bende 16 miyon florin, y ora cu a sali, a pesar di tur critica, a hisa e produccion na 42 miyon florin na benta. A laga atras un stadion Frans Figaroa renoba, un Jaburibari cu tabata un dump y a bira un parke. A laga un stadion di baseball atras na Santa Cruz y dos na Pos Chikito, ademas di centronan deportivo na Simeon Antonio y Jara. “Ta cosnan asina mi kier pa bin bek. Mi no ta bisa cu mester traha stadion nobo, pero mester mantene nan. Mester inverti den e atleta y manera ma bisa, inverti den deporte na scol.” E siguiente directiva mester consisti di personanan cu realmente tin deporte na curazon. Y aunke cu e statutonan actual di Lotto pa Deporte ta limita e autoridad di Minister pa dicidi den directiva, Endy Croes a bisa pa bolbe haci’e e pregunta na fin di October, pasobra e ta convenci cu e miembronan actual lo baha. “Mi ta traha cu hecho, cu diligencia, combersando y cu tactica.”