Proximo eleccion lo vota digitalmente banda di papel

Segun pagina di Facebook di Gabinete Wever-Croes, entrante proximo eleccion lo tin votacion electronico pa agilisa conteo di voto, aunke lo keda cu papel pa asina verifica e resultadonan.

Den un reaccion cortico di Prome Minister Evelyn Wever-Croes na portal di noticia NoticiaCla.com diahuebs anochi, e mandatario a indica cu maske lo ehecuta votacion via medionan electronico, lo mantene e parti papel pa asina por verifica e votonan despues di conteo.

Bon Dia a tuma contacto cu Prome Minister su Vocero pa asina por clarifica riba e anuncio aki, pero e Vocero no a duna declaracion, bisando en bes cu lo manda un comunicado pa clarifica y cu durante un conferencia di prensa den futuro lo tin chens pa haci pregunta.

Votacion electronico ta un realidad den mayoria pais, pero mester bisa cu votacion electronico ta terminologia amplio cu por representa hopi metodo pa colecta voto, esaki ta encera simplemente cu den algun proceso di e votacion ta uza medionan electronico. Asina por ehempel votamento via internet, miho conoci como i-voting ta algo cu lo por cay bou votamento electronico, maske esaki ta algo riba su mes completamente. Estonia ta e unico pais cu actualmente tin votamento via internet.

E aspecto di siguridad ta importante claro, mirando cu lo por tin atentado pa purba manipula resultadonan di conteo. Sinembargo den un video di TLDR News, Katrin Nyman-Metcalf, Director di Programa pa Investigacion y Aspectonan Legal na e Academia di E-Governance di Estonia, ta bisa cu pa un pais manera Estonia cu ta un pais chikito den Europa y ta bastante neutral politicamente, no tin mucho preocupacion cu un poder mundial manera China of Rusia lo bay mete cu resultadonan di eleccion, mirando e esfuerso cu esaki lo trece cu ne.

Esaki no ta descarta cu Estonia su sistema, cual ta uza ambos votamento electronico y votamento via internet, tin su debilidad. Pero pa Siim Siikut, kende ta Chief Information Officer pa gobierno di Estonia, Estonia ta purba maneha e debilidadnan, mirando cu ta mira e efecto positivo cu i-voting ta duna, specialmente pa e cantidad di hende cu ta keda sin vota ‘cual ta un problema cu tin den hopi otro pais’.

Mirando cu Aruba ta trahando di cerca cu academia di E-Government di Estonia, lo ta interesante pa sa si Aruba tambe lo bay den direccion di i-voting, ademas di e-voting. Esaki specialmente lo por ta un solucion pa Arubianonan pafo di Aruba tambe por vota.