(AP) – E tema di e proximo Met Gala y su directiva di celebridadnan a ser anuncia: Pharell Williams, Lewis Hamilton, Colman Domingo, A$AP Rocky y LeBron James lo yuda e musemo lansa un exhibicion cu ta examina estilo di personanan color scur den bistimenta di hende homber durante e decadanan.
Williams y Hamilton tabata presente diaranson mainta pa yuda e oficialnan na Metropolitan Museum of Art anuncia “Superfine: Tailoring Black Style,” e exhibicion cu lo keda lansa na Met Gala dia 5 di mei. Un codigo di bistimenta preciso pa e gala, crea specificamente pa e exhibicion su tema, lo keda anuncia proximo aña.
Esaki ta pa e hombernan: E ta e prome exhibicion di moda na Met den 20 aña cu ta enfoca exclusivamente riba bistimenta di hende homber, cual ta splica dicon casi tur e anfitrionnan ta hende homber.
Hamilton, e strea di Formula 1, a duna remarcanan fuerte riba con moda a bira un manera di expresa su identidad.
Ora cu e tabata hoben, segun Hamilton, “mi tabata obliga pa conforma. For di mi rutina diario te cu kico mi tabata bisti. Mi rutina tabata uno rigido. Y como e unico mucha homber di color scur riba pista, no tabatin ningun hende mane ami cu mi por admira.”
Despues den bida, el a sigui conta, “mi kier a cuminsa expresa mi mes di manera mas creativo y mas specificamente, via moda. Haya mi identidad den con mi ta bisti. E tabata un cambio grandi y positivo.”
“Mi sa e poder di representacion y con moda por ta un vehiculo pa yuda pusha diversidad dilanti y celebra nos diferencianan,” Hamilton a agrega. “Mi ta emociona pa celebra historia di hende color scur y demostra cu inclusion y creatividad ta bay man den man.”
Director di e museo y CEO Max Hollein a bisa tocante e exhibicion, cual lo core pa 6 luna, mas cu exhibicionnan anterior, lo explora “e importancia di e estilo ‘sartorial’ di e formacion di identidadnan di hende color scur den e diaspora Atlantico,” y lo celebra “e poder di estilo como un herment democratico pa rechasa stereotipo y acceso na posibilidadnan nobo.” El a nota cu el a ricibi inspiracion for di un buki, “Slaves to Fashion: Black Dandyism and the Styling of Black Diasporic Identity” skirbi pa Monica L. Miller.
Williams, ken entre su varios persecucionnan ta un director creativo di bistimenta na Louis Vuitton, a cuminsa duna homenahe na artistanan responsabel pa e piramidenan na Egipto, y a papia ampliamente tocante e poder di arte.
“Pa ami, arte ta un expresion di nos humanidad. E ta unda nos ta warda nos historia, e ta e manera cu nos ta conta nos storia y e manifestacion literal di nos soñonan,” Williams a bisa durante e anuncio di e tema.
“Nos ta sobreviviente di loke ta probablemente un di e dificultadnan y tribulacionnan mas intenso cu a yega di sosode na un grupo di ser humano y no solamente nos a sobrevivi esaki, nos a carga e musica, e cultura, e bunitesa y lenguahe universal mas aleu cu tur oceano,” Williams a agrega. “Nos a duna tur cos back na mundo y nos lo sigui y esaki ta loke Met Gala lo celebra, nos, nos regalo, nos historia, nos cuminda, nos resiliencia, nos beyesa, nos estilo, nos forsa y nos autoria.”
Andrew Bolton, curador hefe di Met’s Costume Institute, a nota cu durante e ultimo par di aña bistimenta di hende homber a cuminsa pasa door di un renaissance.
“Esaki ta danki na hombernan di estilo manera Lewis y demas miembronan di e directiva cu no tin miedo di ariesga nan mes ora ta trata nan presentacion propio,” Bolton a bisa. El a agrega cu Williams ta entre e grupo di diseñadornan di color scur talentoso cu ta representa un “creatividad di hende color scur den moda cu nos ta hopi orguyoso di enfatisa den e exhibicion aki.”
Miller, e autor y curador invita, a nota cu den aña 1780, “dandies’ hopi biaha tabata defini como “hende homber cu a presta atencion distingui y hopi biaha excesivo na bistimenta.”
“Definicionnan historico di dandyism ta un rango di precision absoluto den bistimenta te na ta completamente flamboyant y fabuloso,” Miller a bisa. E show aki lo enfoca specificamente riba dandyism di color scur y varios manifestacion.
