ORANJESTAD – Abuso sexual di mucha ta un fenomeno social cu den ultimo aña a causa hopi indignacion den comunidad di Aruba; hopi persona a reacciona riba e cambio di leynan cu lo permiti pa e abusadornan den futuro lo por haya un castigo mas severo posibel.

Durante un entrevista cu Bon Dia Aruba a haci cu Yuri Bracho, ken ta encarga cu realisa un manifestacion diabierna 17 di mei pa 4or di atardi, desde area di Linear Park caminda pa Bestuurskantoor. Despues, pa 7or di anochi nan lo haci entrega di un manifiesto na minister di Husticia Andin Bikker y prome minister Evelyn Wever-Croes.

E motibo di e manifestacion aki, sra Bracho a expresa cu ta pa dokternan cu tin e autoridad, por haci denuncia di un mayor of un mucha, cu no kier papia pa cierto motibonan y asina haci entrega di un keho pa laga e instancianan ta al tanto, cu ta yuda e mucha na momento di un abuso.

El a splica cu nan ta e persona cu ta haci entrega di denuncia contra un hende y cu ta corecto pa aumenta castigo, pa motibo cu ora un persona ta abusa di un mucha e ta keda marca pa e resto di su bida; hopi biaha e abusadornan ta bay prizon pa seis luna, nan ta sali y haci abuso di otro mucha. Tambe ta existi caso unda tampoco nan ta bay prizon. “Si nan wordo castiga, nan mester bay pa mas di 12 aña di nan bida den prizon,” el a sigura.

Di mesun manera el a manifesta cu e ta sinti cu e ciudadanonan lo por tuma mas consenshi, por habri mas nan wowo y asina por alerta nan yiunan mes, manera el a bisa, “mayoria di biaha ami ta haya cu gobierno mester bin cu un medida pa duna e muchanan of mayornan un guia na cualkier luga pa haci algo pa preveni cu ta abusa di e muchanan, pa no gaña nan cu mangel of un cos di hunga y nan no ta bisa nada na nan mayornan. Ban siña e muchanan cu cualkier cos cu un hende ta duna, pa e no tum’e.”

Sra Bracho a informa cu el a haya sosten di organisacion y fundacionnan tambe y cu nan lo bay asisti na e manifestacion pa duna sosten na e marcha; e marcha ta pa e muchanan, “e voz cu nan no tin, e muchanan aki cu no ta papia pa nan mes,” el a comenta.

Tambe e tin pensa di sigui cu mas accion di e sorto aki, pa motibo cu esaki tin un principio pero no tin fin, no ta algo cu simplemente nos ta bay cana, si nos tin cu bolbe bay atrobe aki un luna, nos lo bay p’e, esaki no ta un marcha mas, ami ta bay haci mi best y mi esfuerso pa yega na unda mi por pa logra,” el a sigura.

Tambe el a bisa cu gobierno mester tuma e decision mas lihe, ta parlamento ta cambia ley y el a haya cu nan mester tene un reunion extraordinario y cuminsa trata e ley di abuso sexual, pa motibo cu e ultimo manifestacion tabatin parlamentario y nan ta e prome cu mester bira mas severo contra e personanan aki y pone nan cara riba internet. “Nan mester ta marca riba internet manera Merca ta haci.” Pa finalisa, Sra Bracho a expresa cu e pueblo no mester keda keto, mester papia, busca ayudo, busca sosten, e mucha lo bira adulto y e daño ey e no ta lubida nunca, mientras mas lihe ta haci algo pa nan yiu, mañan nan por ta mas orguyoso, pa motibo cu nan mayornan a duna cara, esey por keda den consenshi como mama of como mayor di e muchanan aki.