Proximamente Operation Mobile Unit lo ta den barionan pa sigui cu programa di vacunacion

Mirando e situacion di crisis di Covid-19 na unda cu ciudadanonan mester a sigui vacuna, Bureau Rampenbestrijding Aruba (BRA) dicidi di tuma over e Bus di Salud di IBiSA cu lo bira Operation Mobile Unit pa asina ey haci e parti logistico y bay mas cerca di comunidad cu e obhetivo di sigui vacuna.

Rino Hermans di BRA a bisa cu e bus aki tabata daña y nan a tum’e over pa haci’e operacional pero mirando cu Aruba no ta un pais grandi, e bus a bira un trailer multiuso na unda cu su prome parti operacional cu pueblo ta bay ta e vacunacion den barionan.

E proceso ta bay tuma luga den 12 seccion cu nan a parti Aruba pa asina vacuna e personanan cu pa un motibo of otro no por yega na e prik post y e ora ey gobierno a dicidi di bay cerca nan pa sigui cu e programa di vacunacion pa Covid-19.

Di mesun manera Hermans a comenta cu nan tabatin dos unidad mobil pa personanan cu ta riba cama y no por move, pero den caso aki ta haya hendenan cu no tin transporte, pa via di edad tin mas dificultad pa move y nan como gobierno ta zorg pa nan “baha e drempel” pa esunnan cu kier bay vacuna por yega na e vacuna, manera el a menciona.

Diferente instancianan a pone fondonan pa e bus por keda operacional pa loke nan tabata espera pa e por keda cla den un tempo di un luna, pero segun el a bisa e lo tuma hopi mas tempo pa via di mal estado cu e bus tabatin.

Despues cu jornada di vacunacion lo pasa, su funcion lo keda pa incidentenan grandi (Incident Command Post) BRA lo keda su administrado, pero tambe por wordo usa pa diferente departamentonan como por ehemplo, programanan preventivo di salud y e ora ey e ta mobil pa personanan cu no tin transporte pa move y por haci un chekeo.

“Bo ta bay wak un Aruba hopi mas activo den su parti di prevencion di salud, pero esey ta un combinacion Rampen Bureau ta zorg pa e logistico y esunnan cu ta gestiona e proceso lo wordo ehecuta”, Hermans a declara.

Asina cu e bus lo keda cla, lo informa pueblo na unda e lo keda para, den e mapa di desaster di Aruba nan tin 12 seccion cu lo parti den tres (pariba, memey, pabou) pa di e forma aki nan por cubri henter e isla durante un luna.