Un proveedor mayor di servicio di software pa gobierno local y estatal a reconoce diabierna cu tabata victima di un atake di ransomware (secuestro cibernetico di data) dos dia despues di bisa clientenan cu un intruso desconoci a compromete su telefon y sistema di tecnologia di informacion.
Tyler Technologies a bisa den un declaracion cu a confirma cu e intruso a usa ransomware, pero no a duna mas detaye riba su respuesta, citando un investigacion andando. Un vocero pa e compania den area di Dallas no a contesta directamente un pregunta si a paga pa habri su sistemanan.
Atakenan di ransomware ta aumentando, atacando den rednan di compania y di gobierno, hortando data valioso prome cu ta encrypt (codifica) esaki y exigi pago. Nan ta menasa di publica e data horta si e victima no ta paga.
Tyler, cu ta un compania publico riba S&P 500, a informa clientenan na henter e pais cu ta usa su software tocante e violacion di data diaranson, pero a bisa cu tabata parce cu e impacto tabata limita y cu no tabatin rason pa kere cu su clientenan tabata afecta. E compania a bisa cu a trece expertonan di tecnologia di informacion externo y a informa agencianan di cumplimento di ley.
FBI a nenga di duna comentario riba e violacion.
Tyler ta provee servicionan di software pa tur cos, for di sistema di maneho di prison y corte, te cu payroll, recurso humano, colecta di impuesto y pagonan, y recordnan di tereno, pa gobierno local y estatal den e pais.
Algun gobierno tambe ta usa un di su plataformanan pa post data di eleccion online, maske e uso aki ta parce limita, y Tyler a bisa cu data pa e software ey ta warda den Servicionan Web di Amazon, no den e red cu a hack.
