Hefenan di polis di Caribe lo bay cera un protocol na Aruba pa asina combati criminalidad internacional den Caribe. Segun nos comisario Trudy Hassell e protocol ta un paso grandi den combatimento di crimen internacional.
E di 32 conferencia anual di e asociacion di hefenan di polis di Caribe ta tumando luga bao e topico di globalisacion y crimen organisa trans nacional , cual ta e tema cu nos Cuerpo Policial tabata tin e honor pa kies e aña aki. Varios compania internacional cu ta produci material pa polis a presenta cu tecnologia hopi avansa y varios material pa combati criminalidad cu nos Cuerpo Policial tin hopi interes den dje.
Pa cinco dia largo, hefenan di polis den Caribe y otro institucionnan ta bin hunto pa papia cu otro tocante strategianan policial. Entre otro con pa ataca e parti criminal na un forma mas efectivo. Durante e conferencia aki lo tin 18 workshops pa polisnan y tur departamentonan cu ta traha conhuntamente cu Cuerpo Policial.
Comisario di polis Hassell: “Asina nos tur por ta riba e mesun nivel di desaroyo y nos ta promove e cooperacion entre tur e departamentonan di Cuerpo Policial. E actividadnan ta varia manera entre otro crimen organisa, social media y con pa uz’e den investigacionnan penal, con pa protege ciudadanonan den Caribe mediante cooperacion entre tur Polis den Caribe y con pa asina garantisa cu e organisacionnan policial ta keda dos stap dilanti di organisacionnan criminal.
Un di e metanan di e conferencia di asociacion di hefenan di Polis di Caribe ta pa firma un protocol di colaboracion entre e cuerponan policial pa cu combatimento di crimen nacional y internacional. E unico forma pa combati crimen internacional, segun sra. Hassell a splica, ta pa medio di uni forsa entre e paisnan, y e protocol aki ta un stap grandi den e bon direccion.
Sala di exposicion
Algo hopi interesante tambe cu ta bini na banda di esaki ta e sala di exposicion di companianan internacional, super renombra riba e tereno policial/siguridad.
Nan a bini cu tecnologianan cu tin pa combati criminalidad cual hopi di nan por seguramente bin na bon uzo pa Aruba. “Tin asina hopi tecnologia nobo cu nos como Cuerpo Policial ta sumamente interesa den nan. Ohala nos por haya e fondonan disponibel pa nos por cumpra hopi di e materialnan aki. Maske cu nos a desaroya grandemente den e ultimo añanan pero nos ta kere cu semper nos por bay un nivel mas halto”, sra. Hassel ta bisa.
Bon Dia Aruba a entrevista Paula Armentrout, vice presidente di Parabon Nanolabs. Nan ta un compania di tecnologia cu ta produci e “Parabon Snapshot” cual tin e habilidad di yuda identifica e sospechoso basa riba evidencia di DNA laga atras despues di crimen.
“Nos tin e habilidad di pone un cara na personanan cu tabata na sitio di e crimen basa riba evidencia laga atras como tambe nos por pone un cara na restonan di skelet.” Esaki y hopi mas ta e diferente tipo di tecnologianan avansa cu tin den e sala di exposicion pa yuda cu e parti di prevencion y combatimento di crimen.
