ORANJESTAD – Minister di Salud Publico Alex Schwengle a anuncia awe mainta cu lo bin cu un protocol nobo pa combati Zika.
Un di e cambionan ta e instancianan di gobierno envolvi lo anticipa cu tur aña lo bay tin un epidemia. Asina den e tempo di october pa maart lo intensiva e trabou di prevencion. Mas detaye e mandatario no por duna pasobra ainda ta traha riba e protocol nobo.
Bon Dia Aruba a puntra e minister dicon lo bin cu un protocol nobo. Den sentido cu desde Dengue mas cu 10 aña pasa a surgi na Aruba, e instancianan manera Departamento di Salud, GKMB, DOW etc ta trahando segun un protocol. Pues nos a puntra si e protocol actual den contexto di e ultimo epidemia di Zika, no a resulta? Minister Schwengle a contesta cu berdad a resulta cu e maneho por tabata mas efectivo.
Manera conoci Bon Dia Aruba tabata e unico medio cu for di trempan a informa pueblo cu tabatin un epidemia di Zika. Departamento di Salud a tarda cu e informacion y na comienso no kier a confirma un outbreak, mientras den e departamento mes tabatin hende cu ya a cuminsa bati alarma for di december. Bon Dia atrobe a haci pregunta over di esaki awe pa aclaria e situacion aki. Sinembargo dokter Wilmer Salazar ta keda insisti cu nan como Departamento di Salud no tabatin suficiente informacion y dato prome cu maart pa asina informa publico cu tabatin un problema cu Zika.
Pero Bon Dia tin prueba cu esaki no ta berdad. Mas detaye por lesa den e edicon di nos corant Bon Dia Aruba.
