Lidernan di protesta na Sudan ayera a pidi pa demostracion y marchanan anochi den capital, Khartoum, y na otro sitio di e pais, entre un enfrentamento tenso cu e militarnan gobernante tocante ken mester lidera e transicion despues di e salida di e autocrata Omar al-Bashir.
E lidernan di protesta a bisa cu nan a cuminsa un ‘escalacion revolucionario’ pa presiona e generalnan di e pais pa entrega poder na ciudadano civil, y pa condena e dispersacion violento di nan camp na man di militar na Khartoum e luna aki.
Mas di 128 persona a fayece desde e accion di e forsanan di siguridad dia 3 di juni ultimo, segun e organisadonan di e protesta. E autoridadnan sosteni pa militar, sinembargo, ta bisa cu 61 persona a fayece, incluyendo tres miembro di forsa di siguridad.
E grupo representando e protestantnan – conoci como Forsa pa Declaracion di Libertad y Cambio (FDFC) – a bisa cu e accion anochi lo cuminsa awe, y marchanan diahuebs.
E yamado ta yega un dia despues cu e vice presidente di conseho militar di Sudan, gen. Mohammed Hamdan Dagalo, a pusha bek contra demandanan di e protestantnan tocante e composicion di un cuerpo gobernante transicional, considera pa e lidernan di protesta como nan ‘victoria mas importante’ den combersacionnan cu e militarnan.
Dura Gambo, un activista cu e Asociacion di Profesionalnan Sudanes, cual a lidera e movemento di protesta desde december, a bisa cu e lidernan a subi bek riba caya despues cu nan a ripara cu e militarnan a cuminsa ‘hala atras di acuerdonan previo’.
A stop cu negociacion entre e militar y e protestantnan despues di un dispersacion mortal dia 3 di juni. FDFC a anuncia un pakete di condicion cual mester cumpli prome cu ta sinta bek riba mesa, incluyendo e formacion di un comision internacional pa investiga asesinato di e protestantnan, restauracion di servicio di internet, y adherencia na cualkier acuerdo prome cu e palabracionnan a stop.
E conseho militar a rechasa e idea di un investigacion internacional. Tanto Ethiopia como Merca a haci esfuerso pa rebiba e combersacion y busca un solucion pacifico.
