Residentenan hoben di Hong Kong, protestando un ley di extradicion cu lo permiti manda sospechosonan na China pa huicio, ta pidiendo pa salvaguardia nan identidad for di represaya potencial na man di autoridadnan, kende ta uza colecta di data masal y tecnologia sofisitica di reconocemento di cara.
Protestantnan na Hong Kong, mayoria di nan hoben, ta cubri nan cara y nenga di revela nan identidad. Nan ta bisa cu nan ta preocupa tocante con autoridadnan escolar lo reacciona si gobierno di Hong Kong of gobierno central di China pidi pa informacion riba nan.
Pa proteha nan privacidad, un grupo a cumpra ticket di train cu cash na luga di uza nan carchi di cash electronico, cual ta pasa nan informacion di biahe y ubicacion na un repositorio central.
E teritorio Chines semi-autonomo a instala miles di camara di siguridad, pero e data mas tanto ta keda priva. Na China continental, gobierno abiertamente ta uza e tecnologia pa localisa hende considera politicamente no confiabel, particularmente entre moslim Uighur, Tibetano, y otro gruponan minoritario.
Ademas di camaranan di cctv a traves di e ciudad, decenas di stacion di television y otro noticieronan ta reportando y publicando imagennan di e demostrantenan.
E actitud entre residentenan hoben na Hong Kong manera Agnes ta refleha un sofisticacion recien entre e criticonan di e gobierno, desde e protestanan masal di 2014 cu a paralisa e area downtown pa demanda derecho di voto universal, pero na final a caba sin logra nan meta. Desde entonces, gobierno a sentencia hopi di e lidernan di ‘Occupy Central’ of e ‘Umbrella Movement’ na prizon, basa riba cargonan vago di disturbio publico of incita hende pa esey.
Polis di Hong Kong diahuebs a bisa cu nan a aresta 11 persona entre e protestantenan di diaranson, y a defende nan derecho pa localisa esunnan manda hospital pa trata herida.
Recientemente a descubri cu autoridadnan Chines ta mantene data en bibo riba mas di 2.5 miyon di persona den China occidental, actualisa constantemente cu coordinada di GPS di nan ubicacion preciso. Hunto cu nan nomber, edad y luga di trabou, tabatin nota di e luganan mas recien cu e persona a bishita, incluyendo moskee, hotel, y restaurant.
E base di dato tabata parce di graba e movemento di persona mediante tecnologia di reconocemento di cara, wardando mas di 6.7 miyon coordinada den apenas 24 ora. Esaki a ilustra con leu China a hiba reconocemento di cara, y ta sirbi como recordatorio di con facil companianan tecnologico por laga recordnan supuestamente priva, habri pa henter mundo por wak.
Autoridadnan Chines tambe a cuminsa desaroya un herment nobo di vigilancia, cu ta uza e forma di curpa di hende y nan forma di cana pa identifica nan, hasta ora nan cara ta tapa.
Ya caba uza pa polis na Beijing y Shanghai, ‘gait recognition’ ta parti di un esfuerso na China pa desaroya inteligencia artificial y vigilancia basa riba data, cual ta lantando preocupacion tocante con leu e tecnologia lo bay.
