Protesta (3).jpg
Un grupo di ciudadano preocupa bao guia di Aruban Warriors a protesta contra construccion di hotel na Isla di Oro diadomingo mainta. E grupo ta bisa cu ta imposibel pa construi algo na Isla di Oro sin causa daño na e ecologia anto ta lamenta cu comunidad di Aruba no ta bini hunto pa protege nos naturalesa.
 
E grupo Aruban Warriors a haci un invitacion na pueblo general, ambientalista, piscado, divers, marine care como tambe tur cu tin nos naturalesa na pecho pa asisti na e protesta aki cu a tuma luga ayera mainta na Isla di Oro. Un ciudadano ta comenta cu: ”Mi ta haya hopi jammer cu nos ta masha tiki hende akinan. Pasobra nos no ta preocupa tanten cu e problema ta chikito. Nos ta gusta laga problema bira grandi anto e ora nos ta bay protesta.” E ciudadano ta sigui splica Bon Dia Aruba cu bo mester para e daño prome cu bo cuminsa pasobra Dios a pone e mangelnan aki pa un motibo cual ta pa e piscanan por rende den lama. 
 
Poblacion di parha a baha 
Isla di Oro ta e cuna di nos ecologia unda cu nos piscanan ta nace anto si nos caba cu esaki, aki poco tempo nos no ta bay tin pisca. Esaki no ta un ecologia cu ta solamente importante pa Aruba, pero pa e mundo completo mirando cu piscanan ta nace akinan cu despues ta bay biba na otro parti di mundo. ”Nos no por pretende cu nos ta stima turista si nos sa cu hopi turista ta bin pa bay wak e rikesa natural cu tin bao di nos lama. No ta e turista cu ta bin pa gasta placa so nos ta haya. Nos ta haya hopi turista cu ta net bin pa e naturalesa.” Segun e ciudadanonan aki, durante e ultimo añanan nos mester ta hopi sincero cu nos mes cu ta hopi di nos naturalesa a bay perdi. Cada biaha bo ta mira cu nan ta bolbe rosa un pida anto esaki a causa cu e poblacion di parha mes a baha hopi aki na Aruba tambe. Segun Presidente di Aruba Birdlife Conservation, si mas habitat of areanan natural wordo perdi, ta menos parha lo tin. Sr. Peterson ta bisa: ”Un ta link cu e otro. Algo hopi kens den e desaroyo aki na Isla di Oro ta cu e desaroyadonan kier uza un tipo di veneno structural pa core cu e sanguranan. Bo ta kere cu ta sangura so nan ta bay venena?” Un ciudadano ta comenta cu: ”Antes na  mi cas mainta, mi tabata haya hopi parha ta bula rond anto tur sorto di parha. Aworaki bo no ta mira nan mas. Mi tin añanan sin wak un chuchubi!” E ciudadanonan ta insisti cu nan no ta haciendo algo politico cu esaki pasobra naturalesa ta bay hopi mas leu cu politica. ”No ta importa bo color politico. Locual ta importante ta cu bo tin cu defende naturalesa pa e generacionnan di futuro.”
 
 
11 mil firma pa protege 16 area di naturalesa
Siman pasa e boluntarionan di Aruba Birdlife Conservation a entrega un peticion cu mas di 11.157 firma na Prome Minister Mike Eman y na Parlamento di Aruba. E meta di ABC tabata pa colecta 5.000 firma pero e sosten pa rescata naturalesa na Aruba ta asina grandi cu a pasa e cantidad di 5.000 firma den 72 ora despues cu a cuminsa cu e accion aki.  E peticion ta un yamada na gobierno di Aruba, Parlamento y Gobernador di Aruba pa entre otro pone un stop na destruccion di areanan di naturalesa na Aruba. 
Tur 21 miembro di Parlamento di Aruba, e institucion mas halto di nos sistema democratico, a vota riba 6 di Februari 2013 unanimamente na fabor pa protege 16 area di naturalesa y laga nan como area natural di importancia nacional. E areanan aki tambe mester wordo incorpora den Parke Nacional Arikok. E peticion ta encera tambe pa no kita e estado protectivo di ningun di e areanan berde na Aruba manera cu ta para den e Plan di Desaroyo Espacial (R.O.P.) ABC ta suplica Minister President Mike Eman pa haci su maximo esfuerso pa yuda regla e proteccion di e 16 areanan aki y pa incorpora nan den Parke Nacional Arikok prome cu fin di e aña aki. E reunionnan entre ABC cu Minister President y Presidente di Parlamento a bay positivo anto nan a sali cu hopi optimismo. Tin un reunion tambe planea cu gobernador pa e siman cu ta bin.
 
 
Proceso ta canando
En cuanto e proceso pa protege 16 areanan di naturalesa, gobierno ta bezig cu esaki anto pa medio di combersacion y preguntanan cu parlamento lo haci, lo bay discuti y analisa kico gobierno lo por haci al respeto. Segun presidente di Parlamento: ”E ta keda si cu e mocion cu parlamento a entrega, esey tabata un mocion cu tabata hopi duidelijk anto ta tog algo fuerte. Mi ta kere cu conhuntamente den relacion cu gobierno, parlamento lo mester bay haci su trabao e ora al respeto.” E hecho cu ABC a bin entrega e peticion na parlamento awo ta haci cu esaki mester cana su caminda tambe pa por haci uzo di locual nan a presenta anto a base di esey tambe discuti cu gobierno al respeto. Presidente di Parlamento ta splica Bon Dia Aruba cu: ” Mi no ta spera di ningun gobierno cu nan kier djis elimina nos naturalesa. E ta asina si cu bo ta haya di gobiernonan, no esun aki pero gobiernonan anterior tambe a haci uzo di e diferente terenonan cu tabata designa pa naturalesa. A haci esaki pa desaroya e pais y pa bo tin ingreso. Henter e discusion di Citgo tambe ta mesun cos. Un banda bo ta bisa Citgo lo daña e aire di esnan cu ta biba rond di e refineria, sin embargo bo ta wak cu hopi hende cu ta biba eynan ta conento pasobra nan tin pan riba mesa.” Esaki ta e tipo di discusion cu bo ta haya segun sra. Mervin Wyatt Ras anto den e caso aki di Isla di Oro, tambe e ta keda na parlamento pa cuestiona e maneho di gobierno anto pa gobierno mas tanto posibel tene cuenta cu parlamento.  Gobierno ta bezig ainda cu e plan aki anto te hasta a bin caba na parlamento pa duna un presentacion riba e asunto aki.