E embargo cu e gobierno Chavista di president Nicolas Maduro a impone unilateralmente contra e islanan ABC (Aruba, Bonaire y Corsou) a bira un boomerang pa su propio pueblo.
E habitantenan di Coro cu tin un relacion familiar y comercial mas estrecho cu e islanan aki a sali riba caya pa protesta contra e medida pisa di mandatario Maduro. E manifestantenan tabata exigi un pronto solucion di parti di e autoridadnan competente pa atende cu e situacion aki. Asina e website noticiaaldia.com a informa dialuna ultimo. Usuarionan di Twitter a divulga potret di e protesta aki.
Nan tabata grita: ‘Nos kier traha’, y nan tabata exhibi banderanan no solamente di Venezuela, pero tambe di e tres islanan ABC. E medida di presidente Maduro ta afecta alrededor di 7 mil trahado cu tabata beneficia directo of indirectamente di e actividad comercial cu e islanan aki di reino Hulandes. Actualmente nan ta brasa crusa sin por traha, y pio ainda sin wordo abastece cu productonan basico for di e islanan aki, ya cu den nan propio pais ta existi un gran scarsedad di productonan.
Situacion
Na momento cu e embargo di Venezuela a drenta na vigor e economista local y miembro di directiva di Camara di Comercio (KvK), Randall Croes a declara na e matutino aki cu e sancion aki ta perhudica mas e pueblo Venezolano, muy particularmente e habitantenan di Coro, cu Aruba mes. Turismo for di Venezuela a cay y Aruba por abastece di fruta y berdura for di otro mercadonan sin problema, pero logicamente na un prijs un tiki mas caro.
E realidad a mustra cu durante mas cu dos luna di e embargo aki e mercado local di fruta y berdura a ahusta su mes. Actualmente nos islanan ta wordo abastece cu fruta y berdura te hasta di miho calidad y nan prijsnan a baha tambe y a bira mas accesibel pa tur hende.
Gobierno di Aruba pa medio di prome minister a yega di expresa den varios ocasion cu a bin cu un accion efectivo pa combati cualkier tipo di actividad ilegal di contrabanda. Pa un hende importa algo di Venezuela bo mester cumpli cu cierto rekisitonan entre nan un certificado di origen, permiso y documentonan cu ta ilustra cu autoridad Venezolano ta permiti bo sali cu e productonan importa for di e pais bisiña ey.
Pues di parti di gobierno di Aruba e situacion aki no a wordo neglisha, pero aparentemente gobierno di Venezuela no ta satisfecho ainda. Te ainda e gobierno di Venezuela no kier a firma un documento conhunto di compromisonan mutuo of bilateral. Tanten esaki no ta sosode, Venezuela ta mantene su frontera cera y e embargo aki ta sigui na vigor.
Manera ta conoci for di januari ultimo e gobierno Venezolano a bin cu un blokeo comercial y di trafico di hende entre Venezuela y e islanan ABC como un forma di sancion contra e contrabanda di productonan y mineral manera koper y oro for di Venezuela pa e islanan aki. Un trafico ilicito cu tin su origen na Venezuela mes. E sancion aki a wordo flexibilisa un poco pa loke ta trata trafico di hende pa motibo humanitario. Sinembargo siman pasa gobierno di Venezuela a dicidi di fortalece e blokeo aki y suspende totalmente cualkier tipo di actividad bilateral.
Un hipotesis cu a circula tabata cu Hulanda eventualmente a nenga e credencial diplomatico na e Consul nobo di Venezuela na Aruba, ex militar Carlos Mata Figueroa. Supuestamente gobierno di su pais a reacciona cu un embargo mas pisa pa bin cu presion contra e decision aki, manera nan a yega di haci tempo cu Hugo ‘El Pollo’ Carvajal a keda deteni na Aruba. Sinembargo fuente digno di tur credibilidad a laga sa na Bon Dia Aruba cu ainda den status quo di Mata Figueroa su credencial diplomatico no ta conoci, kiermen ainda e no ta aproba ni nenga. E fuente a laga sa cu e motibo berdadero cu gobierno di Venezuela a fortalece e embargo aki ta debi cu e companianan aereo y e hendenan a cuminsa abusa di e flexibilidad excepcional cu nan a permiti pa e trafico di hendenan entre ambos pais.
