Residentenan di e sector Los Cocoteros di Maiquetia, estado Vargas, a sali riba
caya pa protesta ayera tardi, debi na e falta di acceso na e cahanan di e Comitenan Local di Abastecimento y Produccion (CLAP), e sistema Chavista di reparti cuminda. E manifestantenan a tranca acceso pa Sorocaima cu tire di auto.
Usuarionan di Twitter a comparti imagen di e manifestacion, den cual a participa varios decena di persona. E demostracion tambe tabata como protesta pasobra gobierno no a paga e bonus di Pasco.
Ciudadanonan di estado Bolivar a reuni na tres punto di e estado pa protesta pa e falta di cuminda cu e habitantenan ta experimenta. Algun di nan a reuni na avenida Botellón, otronan na avenida Victoria y otro na avenida Los Pinares.
Usuarionan di Twitter a reporta e manifestacion y a publica imagen cu ta mustra e
ciudadanonan cu a pone piedra, palo y tire riba caminda. Puente Caroní a keda como unico via habri di comunicacion entre San Félix y Puerto Ordaz.
E trahadornan di Alcaldia Metropolitano di Caracas a protesta ayera pa tercer dia consecutivo pa exigi e pago di nan salario y bonus. E ciudadanonan ta den cercania di e sede di Ministerio di Relacion Interior, Husticia y Paz. E manifestantenan tabata na entrada di e organismo pa pidi cu ta paga nan sueldo, ticket di alimentacion y aguinaldo (bonus di Pasco), loke nan mester a haya na inicio di december.
Funcionarionan di Guardia Nacional Bolivariana (GNB) a haci acto di presencia na e lugar. Parti di e caya tabata obstaculisa pa e ciudadanonan y e efectivonan militar. Un banda so tabata disponible pa trafico. Durante e prome dia di protesta, e ciudadanonan a tranca paso den avenida Urdaneta na altura di Vicepresidencia.
Dia 20 di december ultimo Asamblea Nacional Constutuyente (ANC) a aproba e likidacion di e Area Metropolitano di Caracas y e Distrito di Alto Apure, como organismo estatal. Esaki a causa cu e trahadornan no ta cobra nan beneficio laboral cu estado lo mester a paga nan.
