Festival Internacional de la cancion de Viña del Mar na Chile, esun mas importante di Latino America, a cuminsa diadomingo ultimo memey di protestanan convoca pa via di e crisis social cu a inicia cuatro luna pasa.
Arma cu piedra, palo y bomba molotov, miles di manifestante a marcha pa Quinta Vergara, un parke cu pa 61 aña ta realisa e festival na e balneario di Viña del Mar.
Ora e manifestantenan a ripara cu agentenan anti disturbio tabata contene nan, nan a ataca negoshinan comercial ubica rond di e festival y tambe e hotel emblematico O’Higgins, esun di mas antiguo y elegante di Viña del Mar, na unda pa añanan artistanan importante cu a actua den e festival a keda y actualmente ta duna hospedahe na parti di e hurado di e competencia internacional, bailarinnan y periodistanan.
E incidente a provoca panico entre e ciudadanonan, personal di hotel y algun ekipo di prensa cu ta cubri e festival. E huma di bomba lagrimogeno cu a cay den e lobby di hotel a yega te na di dos piso y bay ariba, loke a provoca e huida di e hendenan.
Segun balans di autoridadnan, te marduga tabatin entre 13 y 15 persona deteni pa via di sakeo, desorden y mal comportacion. Tambe tin 23 polis herida.
E publico di e festival a drenta den e luga tres ora y mey prome di e show despues di pasa dos baricada di siguridad coloca rond di e Quinta Vergara. E hende a drenta lihe, mayoria di nan tabata warda pa wak Ricky Martin, un di streanan mas espera di e festival.
