(EFE) – E protestanan di diaranson ultimo na Colombia, cu a hiba na caya miles di persona mal contento cu e reforma fiscal presenta pa Gobierno na Congreso, a laga dos morto, 26 persona detenido y 44 polis herido, asina como tambe basta dañonan material pa accion di vandalismo, segun autoridadnan.
E episodio mas tenso a ser biba na Cali, na unda e jornada a cuminsa bira mas cayente despues cu un grupo di indigena Misak a tumba e estatua di e fundado di e ciudad, e conkistado Spaño Sebastian de Belalcazar.
E alcalde di Cali, Jorge Ivan Ospina, a destaca “e derecho pa manifesta den contra di politica di Gobierno Nacional” pero a lamenta cu mientras algun tabata protesta, “otronan di manera pre-medita, iresponsabel y criminal, a actua pa vandalisa e Cali stima”
Segun e alcalde, e “personanan aki a dividi na diferente puntonan di e ciudad” y a actua na oriente “na unda desafortunadamente un persona a muri den echonan cu no ta clarifica y cu tin vinculo cu e manifestacion”.
Un otro persona a fayece na Neiva, capital di departamento di Huila, na momentonan cu tabata participa den e manifestacion. Ta parce cu su fayecimento a ser causa pa un atake di epilepsia y , segun e hospital na unda a wordo hiba su curpa, no tabata “presenta perforacion ni herida pa arma di candela”.
Di su parti, minister di Defensa, Diego Molano, a informa cu tabatin 44 polis herido, 30 di nan na Cali y a detaya cu 26 persona a keda deteni na seis ciudad di e pais, 19 di nan na Bogota.
Polis y Gobierno te ainda no a informa riba e number di persona civil herido, pero organisacionnan civil como Campaña pa Defende Libertad, cu ta eleva na cuater e number di fayecido (tres di nan na Cali y otro na Neiva), ta papia di casi mey centenar di herido na varios punto di e pais.
Na Bogota, un grupo di individuo a ataca e instalacionnan di e canal di TV RCN y di su canal internacional NTN24, accion cu a wordo rechasa pa e compania den un comunicado.
