Miles di indigena a blokia pa di dos dia e paso di vehiculo di Colombia pa Ecuador, riba via Panamericana, na un protesta contra e gobierno cu a desata confrontacion y ‘grave represion policial’, segun e lidernan di e mobilisacion a bisa.
E comunidadnan originario di tres departamento di e Sur Este di Colombia a sali riba caminda pa denuncia e incumplimento di varios acuerdo cu nan tabatin cu e gobierno anterior di Ivan Duque, y cu entre otro cos, ta preveni e adhudicacion di terenonan y su derecho pa ta consulta di loke ta trata e proyecto minero na su teritorio.
E indigena tambe ta protesta contra e violencia na su zona, unda a asesina varios lider y ta exigi e cumplimento di compromiso di e acuerdo di paz di 2016, cu a conduci pa e desarme di e ex-guerilla FARC y su transformacion pa partido.
E manifestantenan a atravesa palo i piedra na varios punto di e caretera Panamericana, cu ta impedi e trafico di vehiculo pa Ecuador.
Diaranson tabatin un ‘arremetida contra e lidernan indigena’, diahuebs pasa Edwin Guetio di Asociacion di Cabildo Indigena di Norte di Cauca a denuncia.
Segun su version, e polisnan a uza gas lacrimogeno y tin 17 persona herido, algun di nan di gravedad.
Varios di nan aparentemente ta lesiona pa arma di candela, el agrega, aunke ni un autoridad a pronuncia riba e denuncia.
E minister di Defensa, Guillermo Botero, a limita pa bisa cu e forsa publico a duna prioridad pa e dialogo pa cu nan lo por lanta e dos obstruccion di e via.
