Dialuna mainta, Serlimar a tene un protesta pa motibo di disgusto den area di trabou. Presidente di sindicato, Diego De Cuba a splica cu a bay den accion pa motibo di punto riba mesa.
Trahado ta disgusta y fada. Nan kier mira un cambio lo mas pronto posibel, segun De Cuba. E puntonan cu a trece dilanti ta e problema cu garashi, unda no tin piesa y material pa traha cune, ‘a wordo priminti y nada’. Tambe tin problema di trahado cu ta drenta cu miho salario cu esunnan cu tin hopi tempo trahando.
Luna di juni a yega su fin y nada di barinan di sushi. Den departamento di recurso humano, unda ta insulta hende cu ‘no bay na su amen’, no ta respeta regla, sino ‘ta haci y deshaci’. No ta respeta director actual y tampoco ta bisti uniform.
Loke ta trata promocion, esunnan cu tin pendiente pa hopi tempo, delegado y directiva kier mira e lista di trahado cu falta pa haya promocion y esunnan cu a haya caba. Tambe, segun carta, tin stranhero cu ta haya trabou na Serlimar conforme informacion di e delegado di Serlimar.
Trahamento di overtime na cantidad grandi pa e mesun persona, y ningun hende sa pakico. Chauffeur y cargadonan di sushi ta mal contento. “Si no tin material pa competi, e competencia ta lastra nan. Mayoria di trahado kier firma pa cambia, pa motibo cu no por continua cu persona asina”, De Cuba a expresa.
De Cuba a trece e punto di mal contento di e trahadonan. Sinembargo, a dicidi di habri e porta pa reanuda trabou, pero ta pidi pa sinta cu e director na mesa, pa asina por trece solucion pa e problema. Si no ta asina, lo convoca otro protesta. “Nos a manda e copia di carta pa ministro pa e ta na altura di situacion.”
