(NLTimes)—Un 20 activista di Extinction Rebellion (XR) ta demostrando na balie di KLM den e sala di salida na Schiphol Airport. Marechaussee Real a bisa cu e ta monitoriando e situacion. XR kier pa KLM tuma responsabilidad pa e daño na salud y clima cu ta ser causa pa e limitacion riba vuelo na Schiphol.

“Marechaussee a caba di detene tres manifestante na Schiphol. Un persona e resisti e detencion,” segun e sector militar via Twitter. “E demostracion di entre 20-30 hende a tuma luga den e sala y awo a wordo relocalisa pafo.”

E motibo pa e protesta ta e resultado di e caso legal cu KLM y otro aerolinea a lanta contra e estado. Nan tabata kier a cancela e plan pa limita vuelo na e aeropuerto for di 500.000 pa 460.000 pa aña. E huicio a cay na fabor di e aerolineanan, y nan a duna gobierno e mandato pa para e limitacionnan den e periodo binidero, pasobra esaki no a cuadra cu proceduranan adecua di Union Europeo.

Segun XR, “e salud di hopi ciudadano Hulandes den e area ta wordo menasa” pa e cantidad di vuelo cu ta sali y drenta Schiphol Airport. KLM tambe ta nenga di tuma responsabilidad y reduci e cantidad di vuelo riba su mes un iniciativa, segun activista Pedro Nooijen. “Segun ciencia di clima, ta necesario pa baha biahamento via avion lihe. Esaki ta e unico solucion cu por haci un gran diferencia den e proteccion di salud di residentenan y e clima.”

Gobierno Hulandes a plania pa reduci e cantidad di vuelonan na Schiphol for di 500.000 pa 460.000 den e periodo binidero—cual ta core for di november 2023 pa october 2024—y despues 440.000 mas den e siguiente periodo. E huicio den corte no a prohibi e limitacion pa 440.000 na 2024/5, pasobra gobierno ta siguiendo e procedura di UE pa asina cumpli cu nan meta.

Como un respuesta riba e huicio, SchipholWatch, cual ta un fundacion dedica pa preveni e crecemento di aviacion na Hulanda, a puntra e Inspeccion di Medio Ambiente Humano y Transporte (ILT) pa tuma accion contra Schiphol y e aerolineanan cu ta opera eynan. E fundacion kier pa ILT sigura cu e sector ta cuadra cu e decreto di 2008 di Trafico Aeropuerto, cual ta bisa cu Schiphol por tin te cu 400.000 vuelo pa aña.

SchipholWatch a entre un peticion similar na 2019, pero e corte e nenga esaki pasobra cu e ta asumi cu e permiso temporario pa mas vuelo lo caba fin di e aña aki ora un decreto di Trafico na Aeropuerto bay den efecto. Pero un decreto nobo ainda no a wordo traha, pasobra cu Schiphol ainda ta wardando pa un permiso di medio ambiente.

Awo cu e corte na Haarlem e prohibi e plan di gobierno pa reduci vuelo otro aña, SchipholWatch a puntra ILT atrobe pa reenforsa esaki. “Awo cu Minister Harbers mester bay door di un procedura largo pa reduci e cantidad di vuelo, ciudadanonan ta wordo nenga pa ceirtumbre legal pa un periodo indefini.”