Den un flyer cu ta circulando riba e plataforma Whatsapp y cu ta hala atencion di comunidad, ta wordo informa cu UNHCR (Agencia di Halto Comisionado Refugiado di Nacionnan Uni pa Refugiado) a declara e exodo Venezolano como personanan “refugiado” na nivel mundial.
Pa cu esaki, Bon Dia Aruba a investiga tocante loke mayoria di hende ta denomina ‘Asilo Politico’ pero su denominacion berdadero ta ‘Proteccion di Refugiado’.
Na Aruba e procedura segun articulo 19 di Maneho di Admision y Expulsion conoci como Landsverordering Toelating en Uitzetting (LTU) na unda tin e “Schiphol-Model” cu Hulanda ta aplica, ta regarda e proceso di pidimento di proteccion pa refugiado cu ta stipula cu manera un persona cu no ta Arubiano ta yega na aeropuerto y cu mester wordo admiti na Aruba e por pidi proteccion di refugiado.
E proceso ta indica cu manera cu e persona ta yega na e ambtenaar cu ta traha cu Migracion, e ta haya un formulario na idioma cu e persona ta domina, den e frontera ta wordo controla esaki den caso si e persona ta admisibel of si ta wordo nenga na base cu e no tin un motibo pa pidi proteccion.
Si e persona ta cumpli cu e peticion na e frontera, e ora ey Gobierno di Aruba den un periodo maximo di cuatro siman mester tuma un decision riba esaki, den tempo aki e persona ta wordo poni na Warda Nos Costa den bewaring mientras ta warda un contesta.
Si den cuatro siman aki, gobierno no lo a tuma un decision nan tin cu duna e persona un permiso temporario pa e por mantene su mes na Aruba, esaki ta nifica cu e persona aki por traha.
Segun un fuente cu Bon Dia Aruba tin na Dimas pero e ta keda anonimo, e mayoria di personanan no ta haci e proceso aki pa motibo cu e persona tin cu keda deteni, e gran mayoria ta drenta na Aruba cu avion den calidad di turista of cu boto di manera ilegal y ora nan ta wordo gara pa Warda Nos Costa, e ora ey nan ta pidi ‘Asilo’, “ora cu Schiphol-Model a wordo implementa ni un hende a bin na e frontera mas pasobra nan ta wordo deteni”, segun e fuente a sigura.
Den otro caso, si gobierno a tuma un decision y e resultado di cu e persona ta un refugiado e ta bay haya un decision positivo y e ta haya un permiso temporario cu e por keda na Aruba tanten cu e lo gosa di esey, di otro banda, si e resultado ta negativo e persona tin cu bandona Aruba, e ta wordo deporta.
Asina mes, segun articulo 19-A e persona aki por wordo reconoci como persona cu ta un refugiado si e tin suficiente motibonan, si ora e ta bay su pais back e no por wordo protegi door di su mesun gobierno y tin persecucion, e ora ey e ta wordo reconoci como ‘Refugiado’.
A wordo puntra aproximadamente cuanto personanan a haya e status di proteccion aki pero door cu ta un informacion hopi delicado y interno esey no por keda conoci, solamente cu e cifra ta hopi minimo y ademas cu e persona mester cumpli cu tur e elementonan di e tratado.
Por ehemplo, si un persona cu nacionalidad Venezolano a yega Aruba y ta pidi proteccion pa motibo cu ora e persona tabata na Venezuela a asisti na manifestacionnan anti-gubernamental, esey no ta wordo considera como un persecucion, of tambe si e persona ta indica cu ta wordo persigui pa un ‘colectivo’ un termino usa pa e gruponan paramilitar arma cu ta opera na Venezuela den areanan mas vulnerabel y ta ataca ciudadanonan, pero nan no ta wordo considera como un organo di gobierno central, nan ta existi den cierto regionnan so.
Persecucion ta ora un persona na base di e funcion cu e tin of na base di e persona cu e ta, un organo di e gobierno central a marca e persona aki como e ‘target’,
Tambe, por ehemplo si e persona a haci algo castigabel pa ley y cu gobierno ta persigui e persona aki pa cerel’e, esey no ta motibo pa solicita proteccion pasobra e persona a haci algo contra ley, “e pais tin tur e derecho di haci esey cu e persona”, asina e fuente a destaca.
E mayoria di solicitante di e proteccion aki ta indica cu e motibo pakico nan ta bin Aruba ta pa rason economico, pa nan Aruba ta considera como un di e paisnan cu tin e salario minimo mas halto den e region y geograficamente ta mas cerca di Venezuela. Ta p’esey cu Aruba ta un di e destino mas preferi pa migrantenan Venezolano.
Asina mes, a trece dilanti cu tambe tin casonan di personanan cu tin dobel nacionalidad, por ehemplo cu nacionalidad Colombiano y den caso aki, tampoco e persona por solicita proteccion pa motibo cu tin otro nacionalidad, principalmente nan tin otro pais como opcion pa emigra.
Tambe, a wordo scucha for di boca di algun ciudadanonan e termino ‘Asilo Economico’, algo cu no ta existi, segun e fuente a indica, ta existi emigrantenan economico na unda e personanan ta emigra na otro pais pa motibonan economico, esey ta e rason pa e cual e mayoria di emigrantenan ta yega na Aruba, pa busca un trabou y yuda nan famia na Venezuela.
Proteccion di Refugiado por wordo duna den 5 caso:
- A base di rasa, cu e persona ta wordo persigui door di nan rasa.
- Religion
- Nacionalidad
- Pensamento Politico
- Cu nan ta pertenece na un grupo social por ehemplo ‘LGBT’, tin paisnan Africano, Arabe y Jamaica den Caribe cu ta castigabel pa ley si un persona ta pertenece na e grupo aki.
Ora un persona ta pidi proteccion mester wak si e persona ta cay den e cinco base, si un di e elementonan di e basenan aki ta no, e persona no ta haya e status di proteccion, prome cos cu nan ta wak ta e nacionalidad di e persona.
Pa finalisa, e fuente e menciona cu e mayoria di peticionnan cu nan ta haya ta di Venezolano cu ta bin for di Maracaibo estado Zulia, Coro of Punto Fijo, estado Falcon.
