Legislacion nobo di Senador Mark Warner lo haci cambio na Seccion 230, cu ta protege companianan di rednan social di responsabilidad pa contenido publica pa usuarionan di nan plataformanan. Inmunidad legal reduci por expone e companianan na mas demanda pa loke ta post riba nan website.
Warner, un democrata di Virginia a introduci den Senado diabierna su Safe Tech Act, conoci tambe como e Safeguarding Against Fraud, Explotaition, Threats, Extremismo and Consumer Harms Act. E legislacion lo cambia e proteccionnan cu rednan social tin bao Seccion 230 di e Communications Decency Act.
E cambionan potencial ta inclui:
– Tene plataformanan responsabel pa aviso y otro contenido paga cu ta estafa consumidornan vulnerabel;
– Laga victimanan busca accion legal ora ta usando e plataforma pa haci daño;
– Sostene proteccionnan civil;
– Sigura cu e plataformanan no ta interferi cu leynan di acoso cibernetico y cu victimanan di acoso y abuso por tene nan responsabel;
– Duna famianan un opcion legal contra un plataforma si esaki a contribui directamente na e perdida di un ser keri;
– Permiti victimanan di violacionnan di derechonan humano den exterior busca accion legal den corte Mericano si un plataforma a permiti actividadnan manera e genocidio di Rohingya.
