Despues di e accion di diabierna ultimo di cuerpo di duana dilanti di aeropuerto, tin un proposicion riba mesa awor unda e partidonan por haya nan mesa.
Esaki minister di Financia, Angel Bermudez ta bisa Bon Dia Aruba ayera. E ta informa cu diamars y diaranson ultimo nan a dedica hopi tempo pa observa e situacion actual di e trabou cu ta tumando luga den e sala di yegada di nos terminal aereo, unda personal di Aduana ta staciona pa realisa nan trabou di control. Igualmente nan a debati riba kico ta e plannan y kico a wordo construi caba den e plan di renobacion di aeropuerto. Ayera pa 11’or di mainta, e mandatario tabatin un reunion cu directiva di SADA, pa informa e sindicato di un proposicion cu a wordo traha a base di e reunion sosteni cu tur e partnernan envolvi. Di otro banda, e mandatario a papia cu e gerencia di Triple A cu “ta doño di aeropuerto y basicamente esunnan cu ta dicidi ariba renobacion y alocacion di espacio na aeropuerto”.
Minister Bermudez a declara cu diferente biaha el a sinta cu e duaneronan y nan sindicato SADA y cu director di Duana tambe, y e ta kere cu aworaki a base di nan reunion nan a yega na un proposicion. E ta kere cu den e proposicion aki tur partido por haya nan mes.
E ta spera cu pa medio di e proposicion aki nan por yega na e parti final di e discusion aki pa asina e trabou di renobacion por continua y finalisa.
