(AP) – Un esfuerso legislativo pa preveni cu muchanan di Virginia lo usa TikTok a muri e siman aki den legislatura controla pa democratanan.

E proposicion, cu sponsor di Republicano Jay Leftwich a ser laga den Cas di Delegadonan despues cu a trece dilanti preocupacion tocante con lo aplica e prohibicion aki. Legisladornan a cuestiona tambe si implementa esaki contra un solo compania ta e metodo corecto na un tempo unda tin preocupacion amplio for di tanto legisladornan como mayornan pa loke ta traha e efecto di rednan social riba e hubentud.

E proposicion su falta di movemento efectivamente a mata e medida a causa di un deadlien di procedura diamars pa mayoria legislacion. Youngkin a presenta e yamado pa trece e prohibicion aki di muchanan riba e aplicacion, expresa den un speech cu el a duna den december, como un herment pa proteha muchanan su salud mental, cual ta forma parti di un empuhe mas amplio di su administracion tocante e topico aki.

Leftwich tambe a bisa cu el a trece dilanti e proposicion a causa di su preocupacion pa cu e salud mental y e preocupacionnan di data pa hende hoben. “Henter e plataforma, specialmente menornan, su meta ta pa mantene nan pega den mira e cosnan aki. Esaki ta hiba nan den diferente rumbo unda nan ta keda sinta pa oranan largo mirando e videonan aki,” el a expresa na un audiencia cu e comite.

E proposicion a pasa door di evaluacionnan y cambionan desde e manera cu el a ser introduci na prome. E version mas recien a bisa cu TikTok Inc. y ByteDance, e compania Chines cu ta doño di e aplicacion, “no lo provee acceso na TikTok pa cualkier mucha dentro di Commonwealth.”

E proposicion si lo a permiti un mucha su mayor of persona legalmente responsabel pa e mucha trece dilanti un demanda contra TikTok su un mucha logra haya acceso na esaki. Y si e demandante logra gana e caso, nan por pidi daño di 75,000 dollar pa “cada violacion,” defini como cada instancia separa cu e mucha ricibi acceso na e plataforma, ademas di otro dañonan segun e texto di e proposicion.

Democratanan den e audiencia a trece dilanti varios preocupacion, incluyendo pregunta tocante con lo por aplica esaki y si e gobierno, na luga di e mayornan, mester ta responsabel pa limita e muchanan su acceso na rednan social. Leftwich a responde bisando e legisladornan cu anteriormente a prohibi muchanan di tin acceso na substancianan dañino manera alcohol y cannabis y e ta mira su proposicion den e mesun categoria aki.

Del. Holly Seibold, un democrata, a duna Leftwich danki pa trece dilanti e proposicion, bisando cu e tabata un mayor di hobennan y tambe ta di acuerdo cu e muchanan ta birando adicto na rednan social y nan celular en general, “pero mi no lo sostene e proposicion aki pa motibo cu mi ta kere cu ta inhusto pa solamente aplica esaki na TikTok,” el a expresa.