Bon Dia Aruba a ricibi un remitido di Robert Arends tocante un proposicion pa cambio di ley electoral na Aruba. E motibo su tras ta cu Sr. Arends ta considera e ley actual ta ‘discrimina y ta trata na un forma desigual e votadonan/votonan, candidatonan y partidonan cu ta participa na eleccion di Parlamento.
Como cu ta aña di e eleccion nos ta haya su peticion interesante pa publica. Sr. Arends a traha e cambio necesario den detaye y tambe a manda esaki hunto cu un carta pa parlamento.
Su proposicion ta trata specificamente Capitulo VII di e Kiesverordening di Aruba caminda ta reglamenta con ta reparti e 21 asientonan den Parlamento y caminda ta reglamenta cua di e candidatonan ta keda eligi como Parlamentario. E proposicion ta basa exclusivamente riba e principio cantidad di voto ta determina.
Segun Sr. Arends, e principionan riba cual e cambionan propone ta basa ta:
- E poder pa eligi representantenan di pueblo den Parlamento ta e votadonan y ningun otro instancia;
- Tur voto valido , sin excepcion, mester conta y wordo conta igual, ora di determina cuanto di e 21 asientonan cada partido a logra den eleccion. Tur voto valido, sin excepcion , mester conta y wordo conta tambe ora di determina cua di e candidatonan, a base di cantidad di votonan personal, ta keda eligi como Parlamentario.
- Tur partido cu participa na eleccion mester participa tambe den reparticion di tur e 21 asientonan (“zetels en restzetels “) di Parlamento. No por exclui partidonan pasobra nan no a logra e cantidad di voto igual na e “kiesdeler”, pasobra ta exclui asina tambe un cantidad di votado di tin representacion den Parlamento.
“E cambionan proponi den e Capitulo VII , cu ta contene 21 articulo, ta encera cu 13 articulo ta keda mescos , 6 articulo ta wordo elimina y ta solamente 2 articulo ta wordo cambia”, asina e ta bisa.
E splicacion di e texto di e articulonan ( 91 y 94) ta manera ta sigui:
Articulo 91 ( e lidnan 1 , 2 y 3 ta keda mescos mientras e lidnan 4 , 5 y 6 ta nobo).
Inciso 1: ta indica cu hoofdstembureau ta dividi e total di “stemcijfer” (= cantidad total di voto di un lista) di tur e listanan hunto pa e cifra 21 (= e cantidad di asiento den Parlamento).
Inciso 2: loke resulta for di inciso 1 ta e “ kiesdeler” (= un cantidad di voto).
Inciso 3: ora dividi e “stemcijfer” (= cantidad total di voto di un lista) di cada lista pa e “kiesdeler” ( indica den lid 2 ) ta duna como resultado e cantidad di asiento cu un lista ta haya den prome instante.
Pakico den prome instante? Pasobra despues di aplica e inciso 3 aki , ainda ta keda asiento pa reparti ( e asina yama “restzetels”).
Inciso 4 (nobo): despues di aplica inciso 3 riba cada lista, cada lista lo resta voto (“stemmen”) cu ta menos cu e “kiesdeler”. E cantidad di voto aki cu resta di cada lista ta wordo yama “reststemmen”.
Inciso 5 (nobo): e cantidad di asiento (“restzetels”) cu a resta, despues di aplica inciso 3 , ta bay pa e listanan cu a keda cu mas “reststemmen” ( indica den inciso 4 ).
Inciso 6 (nobo) : ora listanan keda cu e mesun cantidad di “reststemmen” , lot lo dicidi cua lista ta haya e “reststemmen”.
Articulo 94 (ta haya un texto completamente nobo); e splicacion ta manera ta sigui.
Inciso 1 (nobo): segun e cantidad di voto personal cu cada candidato haya, e hoofdstembureau ta traha un secuencia nobo di e candidatonan riba cada lista. Un candidato cu haya mas voto personal cu un otro candidato, ta bin mas halto cu e otro candidato riba e lista cu secuencia nobo. Como excepcion -si Parlamento dicidi asina- e candidato number uno ( e lider di partido) riba e lista original ta keda candidato number uno riba e lista cu secuencia nobo.
Inciso 2 (nobo): ora candidatonan tin e mesun cantidad di voto personal, e secuencia nobo entre e candidatonan ey ta bira e secuencia entre nan dos segun e lista original entrega pa e partido. Di modo cu si candidato A ta mas halto riba e lista original cu candidato B y e candidatonan A y B haya e mesun cantidad di votonan personal, anto candidato A ta bin mas halto cu candidato B riba e lista cu secuencia nobo.
Inciso 3 (nobo): e asientonan cu un lista (partido) haya , segun articulo 91 , ta bay pa e candidatonan cu ta mas halto riba lista segun e secuencia nobo cu ta resulta di lid 1 y lid 2.
Remarca riba artikel 94 , lid 1 : Si Parlamento dicidi cu no ta proteha e “candidato number uno riba lista” ( cu ta e lider di partido) anto por elimina e excepcion menciona den inciso 1.
Bon Dia Aruba a busca conseho y lo duna su comentario den e Editorial di e edicion aki.
