Proposicion di contribucion propio na spoedeisende hulp: Hopi pregunta di parti di organisacionnan di sector salud

Manera a keda conoci siman pasa, HAVA y ASHA a propone un contribucion propio (eigen bijdrage) di 100 florin na spoedeisende hulp. Esaki den marco cu e condicion cu Gobierno di Hulanda a pone pa Aruba pa por ricibi sosten di likides, cual ta cu mester corta 60 miyon den e gastonan di AZV.

Organisacionnan den e sector di cuido a expresa nan descontento cu esaki y a manda un carta dirigi na Ministerraad di Aruba, Raad van Commissarissen di AZV y Gobierno di Aruba indicando nan obhecion contra e introduccion di un contribucion propio. Den e carta extenso nan a subraya algun punto y haci algun pregunta importante pa locual ta trata e introduccion di e contribucion aki, cu ta premira lo drenta na vigor dia 1 di april 2022.

Den e carta e grupo di organisacionnan aki ta remarca cu nan lo desea di sigui contribui na un sistema sanitario stabiel y por lo tanto, a pesar di nos obhecionnan sustantivo na e propuestanan actual di un contribucion propio, nan a presente un serie di opcionnan prepara cu cual Gobierno di Aruba y AZV por cobra e contribucion propio, organisa e medida aki cu eficacia y eficiencia.

E grupo di organisacionnan ta puntra e entidadnan nan plannan ta relaciona cu e deber di cuido cu algun di e dunadornan di cuido/institucionnan di salud, specialmente ora ta trata di pashentnan cu no ta dispuesto of capaz di paga e contribucion aki, y con e plannan aki ta relaciona cu e pashentnan, cu a pesar di e verwijzing di nan dokter di cas, no lo acudi na atencion secundario pasobra nan tin cu paga e gastonan di contribucion propio cu lo wordo introduci y no por cubri nan.

E organisacionnan ta preocupa tambe con e plannan di e medida nobo aki ta relacion cu pashentnan cu a pesar di e receta di nan dokter di cas of dokternan di segundo liña, no ta haci nan examennan di laboratorio pasobra nan por cubri e gastonan di contribucion propio?

Pa locual ta atencion medico atrasa, e grupo di organisacion ta puntra tambe ki calculonan den termino di cantidad di pashentnan, atencion retrasa, costonan adicional debi na restraso of atencion no bon regula, e entidadnan concerni a realisa pa locual ta trata e pashentnan cu no ta ricibi atencion debi cu nan no por paga e contribucion propio.

Ademas nan ta puntra ki calculacion y cifra nan a utilisa pa determina cu lo por evita di haya atencion medico pa motibo di introduccion di contribucion propio.

“Ki ehempelnan di otro paisnan boso a tuma pa prepara boso plannan? Cu cua datonan e Ministerio di Turismo y Salud Publico a informa e Conseho di Minister y AZV di e exactitud di e introduccion di e contribucion propio?”, nan a puntra den e carta.

Adicionalmente, nan ta cuestiona cu ki fundamento e Minister di Turismo y Salud Publico y AZV ta indica na e poblacion ariba e efectonan probabel di cuido di clase y e exclusion di Arubianonan cu lo surgi cu e introduccion di e contribucion propio. Nan ta subraya cu lo bay tin cuido di clase pasobra e incentivonan financiero y e consecuencianan di e introduccion imprevisto lo wordo sinti particularmente pa e miles di ciudadanonan cu ya caba ta luchando financieramente.

Na april aña pasa e pakketversobering (pakete di moderacion) di medicamentonan a wordo rechasa door di Gobierno argumentando cu e situacion economico di e ciudadanonan ya tabata asina malo cu no por a pidi mas sacrificio financiero. E grupo ta puntra kico specificamente a cambia desde e fecha ey pa por exigi y asumi e sacrificionan economico di e ciudadanonan un aña despues?

“Ki descrubimento y conclusionnan tin manera resultado di e pakete di moderacion di medicamentonan temporal di aña pasa y di ki manera e entidadnan ta spera cu esaki lo tin efecto den e cantidad di recetanan cu lo wordo inclui den e contribucion propio premira pa 1 di april 2022?”, nan a cuestiona.

E organisacionnan di e sector di cuido ta menciona tambe cu regularmente ta discuti cu e contribucionnan di pais Aruba na AZV ta hopi halto. E suposicion aki ta sigui influi den e discusion di con halto un contribucion nacional rasonabel mester ta. Nan ta señala cu Gobierno Hulandes den su sistema di seguro di salud, ta aporta anualmente 55% di e costonan total y cu e ingresonan di e primanan pa e compania di seguro por lo tanto ta cubri 45% di e gastonan sanitario cu ta wordo paga a traves di dje. “Con e proporcion aki ta na Aruba? Con esaki a afecta boso decisionnan?”, nan ta puntra den e carta.

Nan ta a cuestiona tambe cua ta e resultadonan financiero y e relacion di esakinan cu e atencion medico concreto cu lo resulta di e medida nobo aki, ki obhetivonan predetermina a wordo crea, cua ta e cifranan basico y con lo midi e resultadonan di manera transparente den futuro.

Ainda no ta cla ki organismo tin e mandato pa e decision final, e organisacionnan aki ta puntra tambe cua organismo tin e mandato pa tuma e decision tocante e introduccion di e diferente contribucionnan propio: ta trata di un modificacion di AZV y por lo tanto ta un mandato parlamentario, of e modificacion premira ta wordo realisa conforme cu articulo 22 di AZV, locual ta significa un mandato di e Conseho di Vigilancia di UO AZV.

Pa loke ta trata algun otro alternativanan en bes di e implementacion di contribucion propio, nan ta cuestiona di pais Aruba a considera e introduccion di un impuesto di sucu (sugar tax) cu no solamente lo por proporciona directamente otro fuente di ingreso pero tin tambe un efecto di promocion di salud den e poblacion.

Por ultimo nan ta di opinion cu sector salud no a wordo involucra y no ta al tanto di e combersacionnan pa loke ta trata e medida nobo aki. Nan ta puntra: “Dicon pais Aruba of AZV a abstene di harmonisa cu e sector salud pa e preparacion necesario di e cambionan premira?”

Potret di archivo.