San Nicolas ta un parti di Aruba cu ta hala atencion pa varios motibo. Un di nan ta su beachnan, naturalesa y cayanan yen di color. Tambe ta hala atencion di turista of mesun ciudadanonan cu ta yega na e famoso cayanan di bar cu muhenan stranhero para pafo, cu algun biaha, no ta mustra bon pa algun of otro turista.
Ayera, durante un conferencia di prensa di San Nicolas Businnes Asociation, Bon Dia Aruba a puntra con e situacion di e barnan lo keda den tur e movecion economico cu lo tuma luga na San Nicolas den proximo lunanan, y con nan lo bay traha pa esaki no afecta turismo.
Hernandez a expresa cu e asociacion tin contacto cu comerciante di e barnan y ta wardando diferente cos pa bin cu algo mas concreto. E prome tema cu nan a combersa ta cu mester busca un parti unda cu e turistanan of ciudadanonan cu ta transita den e caya ta sinti nan un ‘tiki mas sigur’.
Esaki ta un sistema cu ta wordo traha, pero e mesun comerciantenan di e barnan ta di acuerdo cu nan mester yega na un consenso pa por convivi cu otro.
“E sistema t’ey. Loke nos mester wak ta con nos sistematisa esey te ora bin un solucion pa comercio cu semper a existi pa riba di brug”, Hernandez a señala.
El a trece dilanti cu mester busca un alternativa, pero asina mes el a bisa cu nan tin varios idea, pero te ainda no ta algo cla. E propietarionan di bar ta di acuerdo cu asociacion cu nan mester traha hunto pa yega na un miho San Nicolas.
Tocante si e proyecto di remodelacion di caya principal tambe ta inclui e area di barnan, Hernandez a comenta cu esey ta forma parti di e di dos fase, cu ta bay ta te na final di caya y di tres fase ta cayanan alterno.
