Propietarionan di apartamento ta den mas disputa cu asociacion di propietario; Yamada pa solucion nacional

(nltimes.nl) – Propietarionan di apartamento ta den mas y mas disputa cu e asociacion di propietario (VVE). Un encuesta di e Asociacion di Propietarionan (VEH) entre nan miembronan a demostra cu mas di 40% di VVE tabatin conflictonan di duracion largo cu propietarionan, cu regularmente ta resulta den pleito. E VEH a pidi pa e gobierno nacional interveni.

Cualkier hende cu ta propietario di un apartamento of cas ariba of abou ta automaticamente un miembro di un VVE. E miembronan ta responsable pa mantene e compleho y ta dicidi riba gastonan pa reparacion y sostenibilidad. Debi na e transicion di energia y standardnan di calidad mas estricto, e asociacionnan aki tin cu tuma decisionnan cada biaha mas complica y costoso.

“Mientras cu na cuminsamento di e siglo aki, propietarionan mester a dicidi cual compania lo repara e dak y na ki gasto, aworaki bisiñanan mester tene nan mes na un acuerdo entre nan si nan lo inverti den panel solar of si nan kier ta conecta na un red di keintamento,” director di VEH Cindy Kremer a splica na Nieuwsuur.

E VVE ta tuma decision basa riba mayoria, pero mester tene na cuenta e interes di tur propietario. Si un propietario ta fuertemente contra un decision, e por hiba e caso na corte.

“E ta pasa mas y mas frecuente,” Kremer a bisa. E VEH a haya 125 pleito tocante VVE aña pasa tocante mantenemento, gasto di sostenibilidad y pago atrasa. Conflictonan mas chikito tocante cosnan manera hende hibando nan bicicleta den e lift of residente causando demasiado buya tambe ta sali for di control mas y mas frecuente. “Conflictonan chikito ta escala lihe pa motibo cu grupo di sostenedor y opositor ta surgi y tur ta biba bou di un dak, loke ta aumenta e tension for di control.”

Y esaki tin impacto riba e calidad di bida di hende. “Bo ta confronta cu discusionnan tur dia pasobra bo ta biba memey di dje. Specialmente pa e VVE chikito, relacionnan mutuo ta desbarata facilmente. Algun miembro ta sinti insigur. Bo ta keda den un situacion cu no ta stabiel,” Kremer a bisa den un nota di prensa di VEH.

E VEH kier pa e gobierno nacional interveni. “Nos kier wak cu e gobierno ta stimula VVE pa haya un solucion hunto prome,” Kremer a bisa. “Si esaki no ta posible, un red nacional di hues di districto por ofrece un solucion. Cu hues di districto, bo no tin mester di abogado costoso, nan por regla rapidamente sin procedemento complica y largo.”