Pronto psicologo- y enfermeronan di Aruba mester registra den AruBIG tambe

Ayera mainta Departamento di Salud Publico (DVG) a tene un conferencia di prensa pa brinda informacion tocante e maneho nobo di AruBIG cu ta bay introduci pa psicologo y enfermero.

Director di Instituto di Calidad, Jayburtt Dijkhoff, a splica cu un di e tareanan di e instituto aki ta prepara e maneho y ley nobo cu falta pa e parti di AruBIG.

AruBIG ta un ley pa profesionalnan den cuido di salud y e meta di e ley aki ta pa proteha e pashent, e publico en general y ta exigi cu solamente hende cu cierto credencialnan reconoci pa ley por traha na Aruba den e ramo di cuido di salud.

Fuera di e esey tambe e ta proteha e profesionalnan den e sentido cu e profesionalnan cu si ta cumpli cu exigencianan di ley, ta haya un titulo protegi y nan so mag di carga e titulo aki na Aruba.

Dijhoff a indica cu na augustus 2021 AruBIG a drenta na vigor pa cinco profesion: medico, boticario, dentista, fisioterapista y partera. Aworaki a yega e momento cu mester introduci esaki pa psicologo y enfermero tambe.

Pa e motibo ey DVG ta haci un yamada na e psicologonan pa asisti na un reunion cu ta bay tuma luga diabierna 14 di juli pa 11or di mainta na DVG. Den e reunion aki ta bay presenta kico ta bay ta e exigencianan nobo pa por traha na Aruba como psicologo.

Dijkhoff a sigui splica cu e motibo pakico ta haci esaki ta pasobra esaki ta prome biaha cu ta bay tin un registro nacional pa psicologonan. Ainda no tin un registro nacional cu tur e psicologonan na Aruba.

Pa haci e cambionan y e introduccion di ley mas duidelijk cu ta posible, Dijhoff a indica, lo bay splica e procedura pa tur psicologo na Aruba, kico AruBIG ta y kico ta e exigencianan nobo. Entre otro lo informa tocante diplomanan cu ta wordo reconoci y lo bay duna espacio pa splica kico ta pasa cu esnan cu por haya vrijstelling pa registra.

Dijkhoff a agrega cu lo duna splicacion pa e grupo cu no ta haya un of otro forma di reconocemento, ki trayecto nan por haya, kico nan por spera y kico nan por haci. Lo splica, entre otro, di ki tipo di scol adicional por wordo realisa den futuro cercano pa nan tambe por yega na reconocemento

El a remarca cu Aruba ta bay reconoce, contrario na Hulanda, e basis psycholoog, un psicologo cu a caba su masters ariba nivel universitario na Hulanda, Merca of Canada, pa por traha na Aruba y registra den AruBIG.

El a enfatisa cu ta hopi importante pa nan ricibi feedback di e psicologonan cu ta biba na Aruba pasobra aunke ta bay tuma over varios regla cu ta conta na Hulanda, mester tene cuenta kico ta e contexto local y kico ta e necesidadnan local. “Pa por haci esey nos mester e feedback importante di e psicologonan diabierna awo,” el a subraya.

AruBIG ta bay drenta na vigor tambe pa enfermeronan. Dijkhoff a señala cu enfermeronan ta un grupo hopi grandi y door cu ta un grupo hopi grandi ta bay haci e reunion y presentacion a base di invitacion personal na un otro localidad na unda lo invita tur e organisacionnan cu ta representa e enfermeronan of e organisacionnan cu ta tuma e enfermeronan aki den servicio y nan lo hiba e informacion aki back na e grupo di enfermeronan.

El a agrega cu for di e grupo aki tambe ta importante pa nan haya e feedback tocante kico ta e necesidadnan local, pa nan por contesta e preguntanan y si tin mester haci ahuste den e siguiente decreto nacional prome cu AruBIG por drenta na vigor pa e enfermeronan.

“Nos ta calcula pa comienso di 2024 ora cu e decreto nacional drenta na vigor, nos ta papiando di alrededor di 700 profesional cu lo mester registra den AruBIG. E ta un grupo grandi y nos ta trahando duro pa por acapara e grupo aki y nan necesidadnan,” Dijkhoff a enfatisa.

El a remarca cu ta bay introduci e ley di AruBIG pa psicologonan pasobra mester implementa un regla cu ta mas husto cu ta posible.

El a agrega tambe cu no tin suficiente specialista psicologo GGZ (Geestelijk Gezondsheidzorg) na Aruba. Esaki ta un specialidad hopi costoso, no ta tur hende ta haya e oportunidad eynan y gran mayoria ta riba nivel di masters di psicologia,cu ta trahando añas y kizas no ta bay yega na e cantidad necesario pa por haya un asina yama vrijstelling.

Pa e casonan aki, el a splica, ta bay wak con por atende cu nan, den ki fase por keda aumenta e calidad, kico por exigi di e grupo aki di psicologonan y kico e psicologonan por spera tambe di gobierno.

“Pa por haci esey nos ta tene un presentacion estilo ‘town hall meeting’ cu e psicologonan pa asina nos por wak con nos por yega toch na un punto cu tur hende por traha cu otro sin cu mester bisa cu nos ta kita pan for di un hende pa motibo di un ley nobo. Esey no ta e punto. E punto ta pa nos yega na un transicion mas suave cu ta posible,” Dijkhoff a enfatisa.

Pa loke ta trata e grupo di enfermeronan, el a indica cu tin un escasez grandi rond di mundo pa enfermeronan y pa e motibo ey tambe a wak cu diferente stakeholders, entre otro HOH y ImSan, a papia cu diferente grupo y scol door di cual a yega na un seleccion cu apart di Hulanda ta bay reconoce diplomanan di enfermeronan cu a caba scol na Merca, Canada, Belgica y a peticion general Filipinas, pa registra pa traha na Aruba.

Pa loke ta trata Latino America, specificamente Colombia, Dijkhoff a remarca cu aworaki AruBIG ta reconoce dos universidad na Colombia den e profesion di medico y dentista, hunto cu nan specialidadnan.

El a agrega cu no tin un cantidad grandi cu ta bin di e universidadnan ey, pero ta posible si pa nan registra.

El a enfatisa cu esaki ta los di AZV, ya cu AZV ta bisa cu por manda pashent pa Hulanda, Merca, Colombia, Venezuela, Corsou, Sint Maarten, pero mayoria ta bay Colombia como cu e ta e pais cu ta sobresali cu su clinicanan.

El a splica cu hobennan cu kier bay studia den e ramo aki na Colombia por haci esey, pero ora nan bin back nan tin cu pasa un examen na Merca of Canada, cu ta habri e caminda pa nan por bin traha na Aruba.

Dijkhoff a señala cu e desaroyo di AruBIG ta bay keda un trabao continuo pa motibo cu mester keda evalua e necesidadnan. El a menciona otro aña e idea ta pa yega na un ‘Man Power Planning’ nacional. El a indica cu esaki ta bay ser realisa conhuntamente cu Corsou y Sint Maarten, cu tambe tin e necesidad aki, mirando cu enfermero y medico cada biaha ta bira mas escaso y mester cuminsa plania pa futuro cuanto profesional ta bay tin mester, den ki ramo, cua specialidad y no por descarta cu ta wak den otro areanan pa amplia kico e universidadnan ta ofrece pa por haya e profesionalnan back na Aruba pa por sigui traha.

Por ultimo el a splica cu e proceso pa cualkier decreto nacional ta cu mester stipula prome kico ta e exigencianan den e concepto. Unabes esey ta cla lo manda esey pa Raad van Advies, despues lo realisa cualkier coreccion necesario y lo manda e decreto na Gobernador di Aruba pa e firma y asina e lo drenta na vigor.

“Lo duna un periodo di oportunidad pa laga e profesionalnan prepara y laga e instancianan grandi, cu ta tuma varios di e profesionalnan aki den servicio, tambe prepara pa asina por registra. Pa e motibo ey tambe nos ta den contacto hopi estrecho cu nan y ya caba nan por wak kico ta bay bin pa cuminsa prepara y na momento cu e decreto drenta na vigor, ainda tin un temporada cu nan por haci esaki trankilamente,” el a finalisa.