Durante un conferencia di prensa ayera mainta minister di Transporte, Integridad, Naturalesa y Asuntonan di Adulto Mayor, Ursell Arends, a elabora tocante e proceso di saneamento di dump na Parkietenbos. Segun el a informa, e proceso di saneamento lo cuminsa den proximo lunanan y lo ta na caminda pa transforma e tereno aki den un parke solar.

Manera ya ta conoci dia 31 di december 2022 Gobierno di Aruba a tuma e decision pa cera dump di Parkietenbos pa publico. Dump na Parkietenbos ta existi pa alrededor di 70 aña y cu candelanan constantemente e tabata un molester pa e pais y pa henter e bisindario di na Parkietenbos. .

Minister Arends a splica cu pa por a yega na e posicion y decision pa cuminsa cu e saneamento di e tereno aki, mester a zorg pa stop e desperdicio di yega e pa asina nan por a cera e dump.

El a sigui splica cu pa sanea e dump di Parkietenbos ya caba varios paso a tuma luga. E prome paso tabata pa redirigi e desperdicio cu tabata yegando Parkietenbos pa otro companianan. El a indica cu desde 2018 desperdicio residencial y comercial tabata yegando otro compania caba y e otro tiponan di desperdicio tur a keda redirigi pa diferente compania pa nan proceso den un forma responsable.

Una bes cu desperdicio no tabata yegando mas dump na Parkietenbos, Serlimar a cuminsa prepara e tereno pa trabaonan di e saneamento por a cuminsa tuma luga. Tur desperdicio cu ainda tabata riba dump a keda separa pa tipo y esaki tambe a keda redirigi pa otro compania.

A mandatario a resalta cu na e parti di costa di e dump, ainda tin metal cu por redirigi, pero e trabaonan aki lo tuma luga den un fase mas avansa pa motibo cu no ta sigur pa e trahado- y mashinnan opera den e area aki na e momentonan aki.

El a indica cu pa por cuminsa cu e trabaonan di saneamento Serlimar a pidi un hindervergunning. A entrega e desde 15 di maart 2023 y, segun el a menciona, nan ta pendiente na e momentonan aki pa ricibi e hindervergunning na cualkier momento.

E siguiente pasonan cu ta bay tuma luga pa trabaonan di saneamento di dump di Parkietenbos ta instalacion di “monitorwells” y trabaonan pa remedia asbestos.

Minister Arends a splica cu lo realisa e instalacion di e tres “monitorwells” na tres diferente punto riba e sero y cada un lo tin 20 pa 30 meter di profundidad.

El a remarca cu e obhetivo di e monitorwells aki ta pa identifica e composicion di e sero durante cu drilling ta tuma luga. Unabes cu instalacion keda cla, nan lo fungi tambe pa monitor e “hotspots” (puntonan cardinal) den e sero y tambe radioactividad cu tin.

El a sigui splica cu expertonan lo monitor gasnan methano cu tin den e sero y tambe e stabilidad di esaki pa por realisa e trabaonan cu ta andando den diferente fase.

Adicionalmente lo monitor e likido cu por bay den awa, ora awa yobe, y cu por contamina e bida marino cu tin den e area ey.

E mandatario a enfatisa cu e “monitorwells” no solamente lo fungi como fuente di data pero tambe ta un di e hermentnan pa e seguridad di e trahadonan durante e trabaonan pa saneamento di dump di Parkietenbos.

Pa loke ta asbestos, el a indica cu despues di e ciere di dump, tin alrededor di 27 container di asbestos ainda riba tereno di dump y nan ta varia di 20 y 40 pia di grandura. A traves di potretnan aereo cu a saca di e area, minister Arends, a resalta cu ta visibel cu e integridad di e container tambe ta varia pasobra tin di nan cu ta frustia tambe.

Asbestos ta un material peligroso pa salud y medio ambiente y mester atende cune den un forma corecto y estricto.

Pa esaki el a informa cu desde diabierna 23 di augustus 2024 e anuncio pa destaho pa e trabaonan di saneamento di asbestos riba dump a keda publica. E trabaonan pa saneamento lo encera un asbestos cel nobo pa por coregi e manera con tabata y ta anda cu asbestos riba Parkietenbos.

El a splica cu den e añanan cu a expande dump, un asbestos cel nobo e tempo ey a keda estableci y e grandura di esaki ta 50 pa 50 meter cu un muraya di entre uno pa dos meter di haltura riba nivel di awa. Ademas di esaki tin un muraya tambe yama “bondwall”, cu segun el a indica, basa riba inspeccionnan cu a tuma luga tanto door di expertonan local y internacional, ta bao di e superficie di tera.

Esaki ta nifica cu bao di e containernan di e asbestos cel recien, probablemente tin un otro capa di container y basa riba e inspeccionnan realisa pa expertonan, e investigacionnan profundo revisando documentonan y reunionnan cu diferente instancia local, ta sospecha cu tin varios container di asbestos cu no ta full yena, pero si no entre 50% pa 70% yen y e calidad di empake tambe ta varia.

E mandatario a remarca cu simplemente laga e containernan cu ta dera bao tera manera cu nan no ta posibel pasobra den futuro e containernan aki lo por sink y expone e asbestos.

El a indica cu durante e trabao di saneamento lo bay haci inspeccion di e containernan cu den pasado a ser dera pa wak e estado di nan y tambe yenanan completamente pa evita cu nan ta sink den futuro y despues di esaki probablemente nan lo keda unda nan ta.

Por ultimo, minister Arends a indica cu e documento pa saneamento di asbestos ta inclui un ‘Enviromental and Health Safety Plan’ cu ta stipula tur e rekisitonan cu e companianan cu gana e destaho aki mester atene na dje. E plan aki tambe ta valido pa tur trahado di Serlimar cu ta riba e tereno y cu ta envolvi den e proyecto aki.

E destaho pa saneamento di asbestos ta solamente valido pa companianan reconoci door di DTI.