ORANJESTAD- Ampliacion di e productonan basico di consumo domestico, asina yama canasta basico, lo bira un realidad pronto. Asina minister di finansa y asunto economico, Xiomara Ruiz-Maduro, a sigura ayera mainta. Aunke el a bisa cu pronto esaki lo sosode –a lo menos pa un grupo di productonan cu lo complementa e canasta basico– e mandatario no a duna un fecha specifico ainda cu esaki lo drenta na vigor.

Ruiz-Maduro a bisa cu e reunionnan a sigui pa atende cu e parti di ampliacion di canasta basico. Actualmente, e pakete basico ta consisti di 11 producto. Aworaki tin riba mesa pa por amplia esaki cu 22 producto. Tin productonan cu ta bin acerca, pero di otro banda tin un par cu lo cay afo, ya cu considerando e factor salud, a tuma e decision pa saca for di e pakete basico existente locual ta sucu, margarina y manteca.

Productonan basico
El a bisa cu e dianan nos dilanti gobierno lo informa for di ki dia e ampliacion di e canasta basico ta drenta na vigor. Den e proceso di ampliacion di e productonan basico, gobierno tin cu cambia prome un decreto gubernamental.

Nan ta cambionan cu mester wordo haci den e ley conoci como warenwet, caminda tin etiketa cu tin prijs y indicacion di e productonan. E ta algo necesario pa logra e regulacion di control mas efectivo di parti di gobierno. Esey lo tuma un tiki tempo pa loke ta trata e productonan di pasta, spaghetti, papa, hariña y lechi likido. Nan lo trata riba e parti legal pa inclui e productonan aki pa bira uno regula pa prijs limite.

Pero e otro productonan manera papa Quaker, aros blanco y bruin, hariña, berdura congela (broccoli, spinashi), bonchi cora y preto seco den paki (preto y berde), pisca tuna, sardin y salmou den bleki, te, koffie, lechi likido duradero den tetra pack of den boter, cuminda y lechi di baby, tambe ta aden. Nan ta casi cla pa por implementa esaki pronto den e canasta basico nobo.

Aunke e ta menciona e productonan nobo aki cu lo wordo hinca den e canasta basico, e mandatario ta indica cu den realidad, nan mester ta 1200 producto cu lo wordo regula y controla pa gobierno.
“Asina cu nos tin e parti aki cubri, e ora nos lo sali pa indica for di ki dia pa dilanti e productonan aki ta wordo controla,” el a bisa.

Tabatin e deseo pa tin berdura fresco inclui den e canasta basico; pero debi cu nan ta productonan cu por daña lihe, esey ta pone cu e control ariba esaki ta bira dificil. Nan mester evalua un decision miho pa haci’e, segun e mandatario.

Mientras pa loke ta trata pan y webo, nan ta productonan regula caba pa gobierno. Solamente e pan blanco ta esun cu ta wordo regula, y intencion ta pa pan bruin bin acerca tambe. Aunke e panaderianan a bin cu e pan plus a base di un discusion cu a tuma luga na 2011, e pan blanco no ta cay mas bou e regulacion di prijs. Pero aworaki a base di combersacion cu gobierno a sostene cu dos productonan grandi, nan kier bin bek cu e pan blanco regula. E proceso aki ta canando pa esaki por bira un hecho tambe.

Pa loke ta trata webo, esaki ta un producto cu ta wordo importa for di diferente productornan of marca, y esaki ta dificulta tambe e control di parti di gobierno. Pa tal motibo, departamento di asunto economico ta trahando riba un miho sistema pa regula esaki, ya cu e ta un producto basico mescos cu pan pa nos comunidad.