Pronto Cas Marie ta habri un di dos localidad pa sigui brinda asistencia na pashent cu demencia

Stichting Cas Marie ta un di e instancianan na Aruba cu ta enfoca riba brinda asistencia na pashentnan cu ta sufri di demencia. Lisette Does, coordinador di actividad di Cas Marie, ta conta den un entrevista cu Bon Dia Aruba con e fundacion ta traha, e diferente aspectonan importante pa yuda e pashentnan cu demencia y ta indica si ta mira un tendencia di aumento of caida den casonan di e enfermedad aki.

Cas Marie ta un pasadia pa personanan di tur edad cu ta sufri di demencia y ta habri di dialuna pa diabierna. Antes e tabata habri te cu diahuebs, pero aworaki e demanda ta birando mas grandi y a cuminsa habri riba diabierna tambe, desde dos pa tres luna atras nan ta habri riba diasabra tambe. Segun e demanda bay, nan por habri shete dia pa siman.

Does a splica cu aworaki Cas Marie ta bezig cu un di dos localidad. For di 2016 a funda Cas Marie na Savaneta y aworaki e fundacion a wordo acerca desde fin di aña pasa door di un famia cu a haci donacion di un cas pa converti esaki den e di dos localidad di Cas Marie na Macuarima.

El a sigui splica cu na e localidad nobo nan lo cuminsa habri di dialuna pa diabierna, te ora cu e demanda crece nan lo pasa over na habri diasabra y diadomingo tambe.

Does a indica cu pa e localidad di Macuarima tin un idea un poco diferente compara cu Cas Marie na Savaneta. Pues nan kier habri e localidad nobo dos dia special pa e hendenan cu tin principio di demencia.

El a splica cu Cas Marie na Savaneta a ripara cu tin personanan cu comienso di demencia unda casi e no ta riparabel ainda, y nan tin berguensa di yega na e localidad na Savaneta pasobra esnan cu ta bishita Cas Marie Savaneta ta hopi avansa caba y tin biaha e edad ta mas halto tambe.

“Personanan di edad mas abao cu ta wordo diagnostica cu demencia y ta apenas den e etapa di inicio di esaki, pero ora cu topa cu hendenan hopi avansa caba den nan demencia y cu tin edad mas halto, e confrontacion ta mucho grandi y e ora dicidi pa habri na e localidad nobo toch dos dia special pa e hendenan aki y pa nos purba yega na nan tambe,” el a subraya.

El a resalta cu na Aruba cu nan a ripara cu esnan cu tin comienso di demencia tin hopi berguensa pa bisa cu nan tine. A pesar di esaki el a indica cu durante e ocho añanan cu e tin trahando na Cas Marie el wak cu e topico a bira mas moderno si y ta habriendo, pero toch e ta habri pa esnan cu tin edad grandi y no pa esnan cu ta mas hoben.

“Nos ta haya jammer. Esnan cu ta mas hoben, si nan meld aan trempan, por haya e actividadnan terapeutico cu por mantene e habilidadnan basta firme ainda pa e demencia no ataca nan mahos di biaha. Eynan e punto ta pega cu esnan cu tin un comienso no ta yega facil pa motibo di berguensa di parti di e pashent mes of tin biaha di parti di e famia mes tambe,” Does a remarca.

El a destaca cu esaki por tin consecuencianan pa e pashent si no wordo atendi manera debe ser. “Cu e programanan cu nos ta ofrece y cu nos structura, e amor y guia cu nos ta duna, nos por stabilisa e demencia pa basta largo,” el a agrega.

Cas Marie ta un fundacion y ta ricibi un parti su fondonan den subsidio y pa e resto, el a splica, nan ta haci trabaonan extra pa yega na donacion y tambe e clientenan cu ta bishita e pasadia ta paga un contribucion pa cubri entre cuminda y gastonan di servicio na e pasadia.

Does a agrega cu Cas Marie ta coopera tambe cu diferente instancia, ta duna charla na scolnan y recientemente a ricibi stagiairenan for di Belgica tambe.

Cas Marie tin total di 34 pa 35 cliente y tur dia nan ta ricibi 23 te cu 24 persona pa dia. Tin cliente cu ta bin tur dia, tin cliente ta bin dos bes pa siman y tin cu ta bin tres bes pa siman. Esaki ta bay conforme cu loke famia ta desea y e evaluacion cu Cas Marie mes tambe ta haci.

Den algun caso e demencia por manifesta den forma agresivo y den casonan asina, e fundacion mes ta recomenda pa baha e cantidad di dianan cu e pashent ta bishita Cas Marie.

Does a splica cu tur persona tin un tipo di demencia ariba un diferente manera y cada hende tin un caracter. Ta importante pa tene cuenta cu un persona cu demencia tin su caracter personal mes, di unda e ta bin, ki famia e tin, kico funcion e tabatin y ki tipo di demencia e tin, y cada demencia tin su caracter, cada tipo tin cierto aspectonan cu ta resalta apart di e caracter di e persona mes.

El a indica cu di e diferente tipo di demencia cu tin, e tipo mas comun entre e clientenan di Cas Marie di edadnan halto ta Alzheimers. Ora cu ta papia di esnan di edad mas abao tin complicacion cu algo otro tambe, por ehemplo e combinacion di Parkinsons y Alzheimers.

El a splica cu den hopi caso e ta depende di ki tipo di bida, mas tanto entre e pashentnan di edad mas abao, e persona hiba pasobra hopi biaha e hendenan mas hoben ta haye dependiendo di e estilo di bida cu nan a hiba. Diferente factor por contribui na causa demencia, entre otro trastorno, no drumi bon, alimentacion y depresion.

Situacion di demencia no ta baha, Does a indica y aunke e no tabata dispone di cifranan specifico, el a indica cu a base di tendencia y e cantidad di hendenan cu ta yega Cas Marie, e ta keda un proceso cu ta andando keto bay. Constantemente tin hende ta yega pa pidi ayudo locual ta señal cu tin casonan ta keda bin dilanti.

Esaki ta sin agrega e cantidad di caso di hendenan cu tin demencia pero cu tin miedo of berguensa di busca ayudo. El a señala cu esaki ta hopi comun entre e pashentnan di edadnan mas abao. El a indica cu “patras di cortina” nan ta wordo acerca tambe pa personanan cu no kier ta habri tocante nan situacion, locual ta indicacion cu tin casonan cu no ta bin dilanti y cu ta keda un tiki patras di cortina y no ta haya e guia suficiente.

“Nos famia di Cas Marie tin hopi amor y pasenshi pa guia e hendenan tur dia, tur dia ta algo nobo, no tin un programa fiho cu bo por sigui pasobra bo ta traha cu hende y tur dia nan ta bin diferente,” el a remarca.

Does a resalta cu awendia innovacion tambe ta un parti importante. Tin trahadornan mas hoben cu ta bin cu otro ideanan di actividad pa bin cu algo nobo, nan ta pone esaki den practica y nan ripara cu e ta traha, locual ta importante pasobra nan no por keda pega den con cosnan tabata wordo realisa den pasado.

Ademas, el a agrega, e clientenan di antes ta diferente na clientenan cu ta drenta awendia y esaki tin di haber cu gusto, tin di haber cu manera di biba, tin hasta tin di haber cu vestuario, tattoo of religion, entre otro.

“Tin cosnan cu nos tin cu acepta y adapta na nan. Na final tur persona nos tin cu atende y no por discrimina niun hende. De todo un poco nos tin cu traha e aroz con pollo ey pa e por funciona tur dia pa nos tur ta satisfecho cu e trabao y contento y pa hendenan bay contento cas y pa nan bin back mañan,” el a enfatisa.