ORANJESTAD – Directiva di STA, conhuntamente cu su delegadonan, a reuni cu minister Chris Romero y bureau di e minister, tocante e situacion di Arubus NV, pa dialoga ariba e situacion reinante y a papia ariba e director nobo di e compania, cu mester drenta den su funcion den e simannan venidero.
E debe actual di Arubus ta considerabel. No obstante esey, STA a presenta un proposicion na gerencia di Arubus NV, cu copia pa minister, pa asina cuminsa negocia dia 14 di mei venidero un contracto colectivo nobo (CAO). Directiva di STA por bisa cu e reunion a bay den un bon ambiente y cu hopi positivismo, y cu pronto lo mira cambio den gerencia di Arubus. Tambe den e vision nobo di e compania, a pesar di ta un NV di gobierno, lo mester bay competi cu tur e otronan, pasobra su sobrevivencia lo depende grandemente di esey.
Durante un reunion teni dialuna dia 6 di mei ultimo, e empleadonan a wordo poni na altura di e contenido di e concepto pa cu e CAO nobo, y tur a aproba e puntonan cu STA y su delegadonan a bin cune. No lo bay ta e negociacion mas facil –segun presidente di STA, Diego de Cuba- pero si tin boluntad y perseverancia, nan lo logra yega na un CAO nobo cu lo cumbini ambos partido.
Un anuncio cu STA ta haya positivo tin di haber cu e flota di 15 bus nobo cu ta na caminda pa Arubus. Ademas, lo bay tin otro 15 mas den e di dos mita di aña biniendo Aruba. Nan lo forma un flota total di 30 bus, cual ta necesario pa asina Arubus por brinda un servicio optimal na su clientela.
Arubus NV su servicio ta pa henter e comunidad di Aruba y tambe bishitante cu ta bin nos pais. Aparte cu Arubus ta transporta studiantenan y 60 plussers na un tarifa subsidia, tambe nan ta transporta hendenan special. Locual STA ta remarca ta cu hopi di e 60 plussers den nan mayoria no ta hendenan local cu ta traha ta haci uzo di e servicionan di Arubus sacando beneficio gratis di dje. Akinan sindicato STA ta kere cu e subsidio di parti di gobierno mester bay aumenta, y tambe pa locual ta e transporte di studiantenan.
