(AP) – Golden Boy Promotions a bisa den un declaracion ayera cu ta para tras di Ryan Garcia despues di un reportahe cu el a test positivo pa un substancia prohibi prome cu su victoria dominante riba Devin Haney luna pasa na New York.
“Ryan a haci varios declaracion rechasando cu a usa substancianan prohibi cu conocemento – y nos ta ker’e,
e declaracion ta bisa. “Nos ta trahando cu su team pa determina con e hallazgo aki a bin y ta bay atende esaki mas aleu unabes cu nos conclui e proceso aki.”
ESPN a reporta cu Garcia a test positivo pa e substancia Ostarine e dia prome y e dia di e pelea dia 20 di april ultimo, citando un carta di Asociacion Boluntario Anti-Doping (VADA). Ostarine ta un ‘selective androgen receptor modulator’, y su uso por stimula crecemento di musculo. E ta prohibi pa Agencia Mundial Anti-Doping (WADA). Resultado di e test no tabata conoci te despues.
VADA no a responde inmediatamente diahuebs na un solicitud pa comentario. E organisacion ta supervisa test pa droga pa mehora prestacion den boxeo y arte marcial mixto (mma). Atletanan cu ta usa VADA ta bay di acuerdo pa test no anuncia dentro di ocho siman di un pelea programa. WAFA ta haci e test den nomber di VADA.
Garcia a derota Haney, un ex-rival amateur, cu decision mayoria na New York. Garcia a knock down Haney tres biaha y a otorga e campeon WBC super lightweight su prome perdida, pero no a bay cu e titulo pasobra el a surpasa e limite di peso.
Garcia enfaticamente a rechasa cu el a viola regla den un video cu a post riba X.
“Mi nunca a tuma un steroide den mi bida,” Garcia a bisa. “Mi no ni sa unda pa haya steroide. Na final di dia, apenas mi ta tuma suplemento.”
Victoria di Garcia por keda anula si ta confirma e test positivo.
“Nos a haya sa di e situacion aki no hopi tempo atras, y ta lamentable cu Ryan a cheat y a falta respet na tanto e fanaticonan como e deporte di boxeo door di bringa sushi y kibra positivo no un biaha, sino dos,” Haney a post riba su storia di Instagram. “Mi semper a boga pa peleanan limpi y esaki ta un ehempel di esey. Ryan debe e fanaticonan un disculpa, y bayendo pa su tweet recien, ainda e ta kere cu esaki ta un joke.”
