Diahuebs anochi, promer Minister President di Aruba, mr. Henny Eman (75), a wordo hospitalisa.
Segun un comunicado di prensa di partido AVP, e estadista grandi aki di Aruba ultimo añanan ta sufriendo cu un serie di reto cu su salud. Desde algun siman awor e a confronta un acumulacion di contratiempo cu su salud. E situacion a empeora cu e mester a bay hospital diahuebs anochi y a keda interna. Su condicion ta keda stabiel, pero hopi fragil.
Su señora y rumannan tabata cune te laat den anochi.
Henny Eman tin un carera impresionante di tres Gabinete y ta reconoci como e homber cu e vision y e liderazgo pa a crea e industria turistico moderno di Aruba despues cu Lago a cera, segun e comunicado. E industria riba cual henter Aruba ta depende awe.
Tambe el a lidera Aruba den e temponan dificil cu Aruba a bira Pais ariba su mes como e Promer Minister President na aña 1986. Den seno di famia Eman e ta ruman grandi cu a yuda carga e famia na un edad hoben dor di temponan dificil cu nan tata Shon A a fayece y a laga 8 yiu un viuda atras. Famia Eman ta keda positivo, cu poder di Dios, Henny lo por recupera for di e contratiempo aki.
