E promer Minister President di Aruba, mr. Henny Eman (76) ta den un situacion critico pero stabiel den Hospital.
Segun un comunicado di prensa di partido AVP, riba Aña Nobo el a keda interna cu urgencia, y e siguiente dia mientras tabata haci dialisis – un tratamento cu a inicia recientemente – el a haya un complicacion cu su curason, cu a pon’e den estado critico.
Famia Eman a ser yama na hospital cu urgencia pa reuni cu dokter. “Ruman mas chikito, mr. Mike Eman tabata bishitando cas di nos grandinan cu serenata pa Aña Nobo ora el a wordo yama cu urgencia pa hospital pa e situacion critico di Henny,” segun e comunicado. “E estadista grandi aki di Aruba ultimo añanan ta sufriendo un serie di reto cu su salud.”
Mr. Mike Eman a informa prensa cu su ruman ta hopi fragil, pero stabiel na e momentonan aki. “Su condicion ta hopi delicado y e proceso di dialyse ta pone un peso mas grandi riba su curpa. Nos ta pidi nos pueblo pa tene den oracion y cu nos Creador dun’e forza pa e supera e crisis aki.”.
Desde algun aña awor Henny Eman e confronta un acumulacionn di contratiempo cu su salud. E situacion a empeora atrobe hustamente riba Aña Nobo cu e mester a wordo interna cu urgencia na hospital, segun e comunicado. Su señora, yiu-, ruma- y sobrinononan tur a bin hunto na Horacio Oduber Hospital.
Henny Eman tin un carera impresionante di tres Gabinete y ta reconoci como e homber cu e vision y e liderazgo pa a crea e industria turistico moderno di Aruba despues cu Lago a cera, e industria riba cual henter Aruba ta depende awe. Tambe e a lider Aruba den e temanan dificil cu Aruba a bira Pais ariba su mes como e Promer Minister President na aña 1986. Den seno di famia Eman e ta ruman grandi cu a yuda carga e famia na un edad hoben door di temponan dificil cu nan tata Shon A a fayece y a laga 8 yiu y un viuda atras. Famia Eman ta keda positivo, cu poder di Dios, Henny lo por recupera for di e crisis aki tambe.
