Promer ministro Evelyn Wever-Croes a anuncia den un carta fecha 20 di mei 2020, na tur director, hefe di servicio, oficina y funionarionan encarga cu dirigencia, e austerisacion temporal di salario di personal di tur servicio di gobierno.

E carta ta menciona cu, den cuadro di e pandemia di Covid-19 y e consecuencianan economico y financiero pa Pais Aruba, cu conseho di ministro riba 17 di april 2020 a aproba un serie di medida temporal. “Solidaridad di tur empleado di Pais Aruba ta necesario pa sobrepasa e crisis aki conhuntamente,” e carta ta bisa.

Entrante 1 di mei 2020 ta reduci tur salario di funcionario publico y di personal cu contract den servicio di Pais Aruba cu 12,6% di e siguiente forma:

  1. Pa empleado publico, contractant y ‘gelijkgestelden’ den sector (semi)publico cu un salario conforme entre otro Bezoldigingsregeling Aruba 1986 (AB 1996 no. 10), Landsbesluit rechtspositie politie (AB 2011 no. 46), Landsbesluit bijzondere rechtspositiebepalingen douaneambtenaren (AB 1995 no. 59), Rechtspositiebesluit Kustwachtpersoneel (AB 2002 no. 61), Landsbesluit rechtspositie Brandweer (AB 2013 no. 63) y Landsbesluit bezoldiging onderwijspersoneel (AB 1991 no. 35), como tambe personal di Ministerio Publico:
  2. mensualmente 5% di e salario bruto;
  3. 50% di vakantiegeld, reparatietoeslag y najaarspremie.
  4. Pa contractant cu condicion di trabao acorda, e reduccion ta consisti tambe di 12,6%. E porcentahe di reduccion ta ser aplica riba e salario bruto, e vakantiegeld y/o toelagen.

E carta ta anuncia tambe cu loke ta retene awor, no lo ser paga despues mas y tin su efecto riba acumulacion pa pension. Tambe cu si un persona menciona bao di punto 1 o 2 ta haya un toelage o compensacion variable, anto esaki lo ser calcula a base di e salario bruto o compensacion reduci.

Den e carta tambe ta haci un yamado na colaboracion di tur. “Pa sobrepasa e crisis aki, tur hende lo mester haci esfuerzo. Pais Aruba ta conta cu comprension di tur su personal pa e medidanan drastico, pero necesario aki. Hunto nos, como gobernacion fuerte, den circunstancia nunca visto, lo enfrenta e crisis aki y traha di forma decidido na un futuro fuerte pa Pais Aruba.”

En espera di e proceso di legislacion e medidanan ta drenta na vigor dia 1 di mei 2020 y te proximo aviso.