Ayera tardi a yega Aruba e prome vuelo di e aerolinea Britanico, British Airways, for di London. Esaki ta marca e inicio di vuelonan cu lo yega Aruba for di London semanalmente cu lo yuda e turismo di Aruba sigui crece.
Minister di Turismo y Salud, Dangui Oduber, a indica den un comunicado cu e aerolinea ta bay tin dos vuelo semanal cu lo bin for di London Gatwick Airport (LGW) riba diahuebs y diadomingo.
E comunicado ta remarca cu Minister Oduber ta convenci cu e vuelo nobo aki ta bay duna un empuhe grandi na e turismo di Aruba, no solamente den e cantidad di bishitantenan cu lo yega Aruba semanalmente, pero tambe den aumento di e mercado di Gran Britania pa Aruba como destinacion. “E turistanan cu ta yega ta turistanan afluente, turistanan cu ta gasta nan moneda (pounds sterling) ta hopi fuerte.”
Durante e ceremonia oficial di e vuelo inaugural for di London, a tuma luga e acto simbolico di cortamento di cinta pa yama bon bini na e aerolinea y pasaheronan cu a yega pa bishita Aruba. E acto di cortamento di cinta a keda den man di Minister di Cultura y Finanzas, Xiomara Maduro, ken tabata presente den representacion di Prome Minister Evelyn Wever-Croes.
Durante su discurso, Minister Maduro a ratifica cu esaki ta un logro importante cu lo habri hopi porta y oportunidadnan pa e crecemento economico di Aruba y cu lo sigui yuda cu e desaroyo continuo di e industria di turismo pa e isla.
“Teniendo un vuelo for di London Gatiwck Airport ta duna Aruba un porta adicional na Europa cu lo permiti nos conecta cu e otro destinacionnan Europeo. E destinacionnan aki ta habri un mercado nobo cu lo provee Aruba cu un oportunidad unico y punto di bentaha como e prome isla di e Reino Hulandes den Caribe cu ta conecta directamente cu e Reino Uni,” Maduro a indica.
