For di 2019 frontera entre Aruba y Venezuela ta cera, tanto pa vuelonan directo como pa transporte maritimo directo. Esaki, manera conoci caba, tin su efectonan ariba diferente sector, sobretodo den e sector di comercio. Den un entrevista pa Bon Dia Aruba, Sr. Adan Célis, prome vice-presidente di Fedecamaras Venezuela, a splica ariba e importancia y plannan di sensibilisacion pa elimina e ciere di e frontera entre e dos nacionnan.

Célis, kende ta di bishita na Aruba y lo reuni cu Minister di Labor, Energia y Integracion, Glenbert Croes, a splica den su entrevista cu e tema di sensibilisacion tin un rol hopi importante pa logra obhetivo di elimina e ciere di e frontera. “Sensibilisa e opinion publico y sensibilisa e funcionarionan di tanto e gobierno Venezolano como e gobiernonan di islanan ABC pa por lanta e restriccion cu tin entre e pueblonan ruman aki”, Célis a bisa.

El a remarca cu mas leu di e diferencianan cu por tin entre e gobiernonan, e pueblonan mester ta uni, no mester tin niun hende cu mester revoca e libertad y suprimi e dos pueblonan, y e ta sigura cu tin formanan di controla tur cos sin e necesidad di yega na ciere di e fronteranan.

Despues di casi tres aña cu e frontera ta cera, e procesonan di negociacion pa logra e obhetivo di habri e frontera a demostra di ta procesonan complica cu ta rekeri hopi diplomacia di ambos pais y palabracionnan concreto di hopi medida di control cu mester haci. Pero Célis a sigura cu nan ta keda optimista cu lo por habri e fronteranan pa comercio.

“Por lo tanto mi ta kere cu den e proceso cu nos ta y si nos continua haci esaki, e empresarionan y hopi otro personanan cu ta involucra den e tema ta sigui cu hopi optimismo e realidad cu nos lo por habri e fronteranan pa e comercio, pero tambe e frontera pa e intercambio di persona”, el a agrega.

Sin duda e relacion entre e dos nacionnan, Venezuela y Aruba, ta uno cu hopi historia y durante su entrevista Célis a accentua e “hermandad historico” cu tin entre e pueblonan. El a subraya cu tin posibilidadnan di tur loke ta e comercio, turismo y sin laga afo oportunidad di cuido di salud. A pesar di e situacion grave humanitario cu tin na Venezuela, el a enfatisa cu na Venezuela tin ainda un sistema medico hopi bon, e sistema medico priva specialmente, cu segun el a indica ta uno cu tin hopi bon dokter ainda.

E prome vice-presidente di Fedecamaras a ratifica cu e turismo Venezolano ta representa tambe un papel hopi importante pa e islanan Hulandes y por supuesto tur e factornan di comercio. “Asina ta nos ta bay sigui cu e proceso aki di sensibilisacion y nos ta bay sigui pusha pa nos por logra habri pa caba e fronteranan y por tin e intercambio di persona y comercio, manera cu e tabata tradicionalmente, y nos ta spera cu e por continua”, el a finalisa.

E situacion alrededor di e ciere di e frontera entre Aruba y Venezuela a cuminsa na momento cu e presidente di Venezuela, Nicolas Maduro, a dicidi cu pa un periodo di 72 ora dia 5 di januari di 2018, el lo cera e frontera. E medida aki tabata dirigi pa e islanan di Corsou y Boneiro y e tempo aya, Maduro a sigura cu e decision aki tabata “pa presiona pa un intercambio sano”.

Na 2019, Prome Minister Wever-Croes a tuma nota cu vice-presidente di Venezuela a declara cu nan tabata dicidi pa habri e frontera, pero dia 10 di mei el a firma un decreto pa cera e frontera entre Aruba cu Venezuela. Esaki motiva na e situacion politico, economico y social cu e pais bisiña tabata pasando na unda Aruba a registra un aumento di migrantenan cu na e momento ey, por tabatin efectonan riba orden publico y seguridad di Aruba, cu ta den interes general.

Den luna di juli a circula un noticia ariba algun medio di comunicacion y ariba rednan social cu tabata sigura cu e frontera entre Aruba y Venezuela lo habri back y vuelonan directo entre ambos nacion lo cuminsa.

Pues e noticia aki a causa conmocion y redactor di Bon Dia Aruba a tuma contacto cu Prome Minister Wever-Croes, cu tabata na Hulanda e tempo ey, ken a indica cu e noticia aki no ta corecto. “Nos tine cera ainda, pendiente di autoridadnan Venezolano. Nos ta trahando si riba dje”, Wever-Croes a sigura.

Pa coregi e noticia aki Gobierno di Aruba a saca un comunicado di prensa oficial pa informa pueblo di Aruba cu frontera no ta habri.

“Ta informa cu Gobierno di Aruba ainda ta den negociacion cu autoridadnan Venezolano. Prome minister ta pidi tur ciudadano di nos pais, specialmente ciudadanonan Venezolano cu a haci di nos pais nan hogar, pa keda trankil y no kere noticianan cu no ta sali for di Gobierno di Aruba. Gobierno di Aruba ta sigui cu e esfuersonan pa yega na un apertura di frontera na forma responsabel y controla, pero pa esaki mester di mas cooperacion di autoridadnan di Venezuela”, e comunicado a enfatisa.

Pues ainda no ta conoci si lo habri, of ki tempo lo por habri, e frontera entre Venezuela y Aruba, pero manera Sr. Célis a indica, e reapertura di e frontera ta presenta oportunidadnan grandi pa e area di comercio cu lo beneficia ambos nacion grandemente.