Recientemente, Bon Dia Aruba a tene un entrevista cu e prome vice-presidente di Fedecamaras Venezuela, Adan Celis, den cual a discuti e tema di reapertura di frontera entre Aruba y Venezuela. Celis a destaca cu Fedecamaras ta den un campaña di sensibilisacion pa conscientisa e pueblonan riba e beneficionan di reapertura di frontera.

Migracion

Prome minister Wever-Croes luna pasa a menciona e crisis migratorio di Venezuela como un di e motibonan pakico a scoge pa e tene e frontera cu e pais bisiña cera. Tocante esaki, Celis a menciona cu “e tema ta turismo, pasobra na final ta turismo”. “Tin forma pa controla. E paisnan ta soberano den con nan ta maneha. Pero e solucion no ta pa cera definitivamente algo, pasobra ora bo ta cera bo frontera, tambe bo ta cera porta pa turistanan cu por a bin consumi productonan, keda den hotel, y participa den e dinamica di economia”, Celis a comenta. Mientras e ta reconoce cu un ciere di frontera ta stop entrada na esnan cu ta bin cu otro propositonan cu no ta turismo, e ta destaca cu tambe ta cera e porta pa esnan cu por tabata huur un cas di un Arubiano of camber di hotel cu ta wardando pa un huurdo. El a enfatisa cu tin sistemanan di control di migracion na lugar caba, “y esun cu no ta cumpli cu e rekisitonan necesario, no ta drenta. Pero no cera e porta pa tur hende.”

Ademas, pa Aruba esaki ta un tema na nivel di Reino, ya cu Relacionnan Internacional ta responsabilidad di minister Hulandes, actualmente, Wopke Hoekstra. Mirando esaki, Bon Dia Aruba a puntra Celis tocante un reunion recien cu el a tene cu embahador di Hulanda pa Venezuela, Robert Schuddeboom. “[Fedecamaras] ta mantene un contacto cercano cu e embahador na Venezuela”, Celis a contesta. “E ta un persona hopi preocupa pa cu e tema di frontera, hopi atento, hopi involucra. E ta un persona hopi amigo di Venezuela, di pueblo di Venezuela pero tambe hopi atento na su funcionnan. Pues mi ta kere cu nos tin un gran aliado den dje, un persona cu ta hopi atento.”

Celis a enfatisa cu despues di e pandemia y den temponan economicamente dificil, “nos tur mester di turismo”. “Arubianonan mester Venezolano bin como turista, pa disfruta di e maraviyoso sistema turistico di Aruba, y Venezolanonan mester di Arubiano pa bin como turista, of pa ricibi tratamento medico.”

Seguridad alimentario

Di otro banda, tin e tema di comercio. Pa Celis, “ta fundamental pa habri e sistema di comercio.”
“Na prome lugar, nos amigonan Arubiano tin mester di productonan Venezolano, pa soberania alimentario y seguridad alimentario, den un situacion asina volatil manera actualmente den mundo, y cu un tema asina complica manera ta sucediendo cu tur flete, pa tin abastecemento cuatro ora leu, cu barconan hopi simpel cu por bin yen for di Venezuela, yen di producto agricola, fruta. Mester haci e intercambio aki pa necesidad, tanto necesidad Arubiano como necesidad Venezolano.”

“E Arubiano pa por tin mas seguridad alimentario den un situacion asina dificil y volatil manera tin den mundo. Y tambe pa Venezuela, pa nos productornan den necesidad, specialmente na estado Falcon, cu tin mester di bende nan producto den un mercado asina importante.” Segun Celis, esaki lo mester ta e enfoke di ambos pais, e necesidad di e dos pueblo pa bolbe haya un encuentro.

Bon Dia Aruba a puntra Celis tambe mirando e crisis economico na Venezuela, cu a mira reduccion enorme di produccion na e pais, ki posibilidad nan ta mira, na momento cu e frontera habri, cu lo por tin exportacion pa Aruba. “Exportacion ta fundamental. Pa Venezuela tambe tabatin exportacion for di Aruba, por ehemplo keshi Hulandes, bebida alcoholico. Y e exportacion Venezolano ta fundamental. E Producto Interno Bruto (GDP) Venezolano a disminui di forma hopi importante. Tin un capacidad productivo hopi importante, nos ta papiando di cu, den promedio tur sector ta trahando na un 25%.” Pa Celis, esaki ta representa un potencial di produccion cu por wordo materialisa. “Esey ta importante, cu tin un capacidad ocioso pa produci, ansha pa drenta e mercado.” Y esey lo conduci na productonan mas fresco y na un miho prijs, “cu lo sali casi for di e campo pa yega directo na e supermercado.”

Ademas, Celis a destaca cu semper ta miho pa tin mas proveedor, ya cu esaki ta duna mas competencia y miho oportunidadnan pa yuda e cartera di pueblo Arubano.

Frontera maritimo

Mencionando e declaracionnan mas recien di prome minister di Aruba, Evelyn Wever-Croes, cu ta negociando prome e opcion pa un apertura parcial di e frontera maritimo cu Venezuela, Bon Dia Aruba a puntra Celis si e tabata na altura di algun desaroyo pa cu esaki. “Wel, den e sentido aki nos ta bezig.”
Pero el a agrega cu e no ta considera esaki suficiente. “Ami ta di esnan cu ta kere cu nos mester habri tur frontera, maritimo y aereo. Ta bon pa habri e frontera comercial, pero nos opinion ta pa habri tur cos”, el a bisa referiendo na intercambio di persona. Den esaki el a destaca cu tin mecanismonan di control di inmigracion na lugar caba.

“Pakico mester prohibi, of limita e posibilidad entrada na personanan cu tin vivienda, negoshi na e isla, cu ta hendenan cu ta participa den produccion, cu ta trece dollar, pakico mester limita pa nan?” Celis a comenta. “Ban limita cu un sistema selectivo esnan cu ta bin haci turismo for di esnan cu no.”

Celis a recorda tambe cu e lasonan historico entre ambos pais tambe ta nifica cu tin hopi matrimonio entre Arubiano y Venezolano, y e ciere di frontera ta nifica cu hopi hende ta haya dificultad pa reuni cu nan famia.

Politica
 Bon Dia Aruba a puntra Celis ki posibilidad e ta mira pa yega na e acuerdonan necesario entre Aruba y Venezuela pa apertura di frontera, teniendo cuenta tambe cu e actual negociacionnan entre e regimen di Nicolas Maduro y e Plataforma Unitaria di oposicion Venezolano.

Pa Celis, “e tema fronteriso mester ta separa di politica”, pasobra e ta casi un tema humanitario. “E ta un tema di relacion di dos pueblo. Nos ta invita pa separa e debate politico for di e hermandad entre dos nacion. Esey ta loke nos ta pidi, ban saca politica di e debate publico y ban pesa riba hende.”

“No tin nada cu ta uni dos pueblo mas cu comercio”, Celis a comenta, destacando comercio integral, tanto producto como industria turistico y medico, entre otro. “Esey ta haci di berdad cu dos pueblo ta trece hunto nan relacionnan economico, social, pues esey ta e yamado cu nos ta haci. Por fabor ban pensa riba hende, ban aumenta e desaroyo comercial y di persona entre ambos nacion.”

“Y hendenan ta bay ta agradecido”, Celis a continua. “Arubiano y Venezolano ta bay ta agredecido, e dia ey ta bay tin fiesta tanto na Venezuela como na Aruba pa celebra cu dos pueblo ta bolbe duna man, cu nunca mester a separa.”