Despues di e prome vacunacionnan cu a tuma luga na Aruba ayera, e siguiente evento di vacunacion a tuma luga na Hospital Dr. Horacio Oduber.
Pa 4:30pm, un team di trahado di varios departamento di hospital, consistiendo di 7 persona pa ricibi e vacuna y seis persona pa administra e vacuna a presenta pa e ocasion historico aki. E personanan tur a ricibi e vacuna na mes momento. Tabata trata di trahadonan di B3 cu ta departamento di covid, enfermero di ICU, miembro di Hunta di Directiva, colega di Medisch electronica, ciruhano na HOH, vocero di HOH y specialista di pulmon tabata e prome 7 coleganan di HOH cu a ricibi e vacuna contra covid-19.
Bon Dia Aruba a acerca Caroline Becker, specialista di pulmon na hospital, ken a ricibi un di e siete prome vacuna na hospital. Dr. Becker a declara di ta sinti su mes orguyoso y contento di forma parti di e momento historico aki. Como cu e ta traha directamente cu pacient, el a cay den e prome grupo aki cu a ricibi e vacuna. “Mi ta sumamente contento di por contribui. Mi ta kere esaki ta e prome stap pa yega na e solucion di e problema aki, y mi ta contento mi por a participa.”
E momento aki a marca e inicio di e vacunacion pa personal di hospital, cu ta den e gruponan di prioridad pa ricibi e vacuna. Segun un comunicado di hospital, un total di 591 colega na HOH a registra pa ricibi e vacuna di Pfizer contra covid-19. Un team grandi a traha duro tras di cortina pa asina por start sali cu u programa y haci e esaki un realidad na Hospital mes cu nos profesionalnan di botica, enfermeronan y mas ta asisti.
Dr. Becker a agrega: “Ban cuida tur esnan rond di nos, tuma e vacuna mescos cu ami a haci awe, pa asina riba termino largo por garantisa cu nos sernan keri ta safe”.
“Esaki ta e prome paso pa poco poco nos bay back na e bida cu nos tabata conoce. Un bida unda tur nos pashentnan por ricibi e cuido necesario na e momento necesario. Mi ta sinti mi bon y ta spera di por inspira mas hende eyfo pa dal e paso aki paso hunto so nos por logra combati’e. P’esey nos a scohe pa den forma di team nos tuma e prome vacuna na Hospital paso mas hende vacuna, mas lihe nos por cuminsa biba bek”, esey ta loke Charlaine Huntington, vocero na HOH a duna di conoce.
