FHMD Campaña y dialogo JO (3).JPG

Ayera a haci net un siman cu Fundacion pa Hende Muhe den Dificultad a cuminsa cu nan campaña di conscientisacion titula “Orange Aruba”. E siman aki tabata un siman unda cu a pone hopi dedicacion riba conscientisacion di e problematica di violencia contra hende muhe y nos muchanan.

Coordinador di FHMD, Sra. Magaly Maduro ta bisa Bon Dia Aruba: “Nos a bay bishita scolnan, nos tabata tin algun charla como tambe e inicio di e programa cu Minister Paul Croes a habri.”  Tin diferente punto di bista y diferente angulo ora ta trata e problematica di abuso domestico y pa e motibo aki ayera diferente instancia y hende a bini hunto pa pone luz riba e problematica aki di nan parti den un charla basta interesante. “Den e manera aki nos por bini hunto pa yega na un miho bista na con e problematica aki ta den aña 2016. Nos a concentra hopi riba e hobennan pasobra e fundacion tin 21 aña di existencia anto despues di 21 aña, e problema ainda ta sigui. Mi kier pa hobennan bin porta cu ideanan nobo, innovativo y fresco pa duna nos tambe mas miho bista na con pa trata cu e problematica aki pasobra nos tur sa cu e problema a bira mas grandi y el a bira diferente,” Sra. Maduro ta subraya.

Dialogo publico
Ayera FHMD tabata tin pa prome biaha un dialogo publico na Universidad di Aruba riba e tema di abuso domestico contra hende muhe y muchanan. “Esaki ta e prome biaha nos ta haci algo asina pero e no ta bay ta e ultimo. E intencion di un dialogo publico ta pa Fundacion pa Hende Muhe den Dificultad por haya informacion di publico en general ariba na ki puntonan nos tin cu concentra nos campañanan di conscientisacion,” presidente di FHMD Sra. Suzy Kock ta comenta. Segun FHMD,  esaki naturalmente ta e unico manera pa haya informacion directo for di esunnan cu bo kier haya informacion di dje enbes di bay haci un encuesta of pidi nan pa yena un formulario. Den e dialogo aki tabata tin seis panelista anto un moderador. E moderador den e caso aki tabata Sr. Glenn Thode kende ta bisa Bon Dia Aruba cu: “Violencia domestico ta sali for di situacion di conflicto anto situacion di conflicto por wordo rebaha ora cu bo ta dialoga anto crea comprension.” E panelistanan cu tabata presente tabata Sr. Michael Quandt di Fundacion pa Hende Homber, Sr. Atan Lee kende ta ex hefe di Protocol como tambe un escritor, un hoben hurista, hefe di recherche, Sra. Enid de Kort cu ta un terapista cu Directie Sociale Zaken y Sra. Maria Carrasquilla cu ta trahado social na FHMD.

Maneho pa famia
Segun terapista di famia, Drs. Enid de Kort: “Aruba mester bin cu maneho pa famia y nos mester bay cu curriculum na scol caminda nos ta educa mucha homber y mucha muhe for di chikito. Nos ta wak cu esaki ta un circulo vicioso. Tin ora problemanan ta cuminsa subtilmente anto nos no a siña con pa anda cu problema, nos ta discuti anto e ta bira tension y crece bira violencia.”
Sra. de Kort ta comenta cu hopi hende ta crece ta mira nan mayornan pleita y bringa anto asina nan a kere e ta algo sano unda cu inconscientemente nan ta cuminsa trata nan pareha mescos.
“Mi ta kere e cadena ey mester kibra y nos tin cu bay trata e famia anto cuminsa na scolnan unda cu no tin por ehempel niun vak unda cu nos ta prepara pa bida y relacionnan. Bida sin relacionnan no ta haci un sociedad sano. Mi ta kere cu si Aruba kier kibra e cadena aki, nos tin cu cuminsa sigur na scolnan,” Sra. de Kort ta splica Bon Dia Aruba.