(AP) – Investigadornan di lama profundo a completa e prome scan digital di Titanic, mustrando henter e restonan di Titanic den detaye y claridad, e companianan tras di un documentario nobo a splica diahuebs.
Usando dos ekipo, un ekipo di investigadornan a pasa 6 siman ultimo zomer na North Atlantic creando un mapa di henter e restonan di e barco y e veld alrededor, unda tabatin pertenencia di e pasaheronan manera sapato y holoshi plama rond.
Richard Parkinson, e fundador y hefe ehecutivo di e agencia di exploracion maritimo profundo Magellan, a calcula cu e data resultando den 715,000 imagen ta 10 biaha mas grandi cu cualkier modelo 3D di bao lama cu a yega di traha anteriormente. “E ta un copia unico digital, y un ‘twin’ di Titanic den tur su detayenan,” anthony Geffen, e hefe di documentario na Atlantic Productions a comenta.
Titanic tabata den su prome biahe for di Southampton England direccion pa New York City ora cu el a dal contra un ijs na Newfoundland dia 15 di april 1912. E crucero luhuso a hundi dentro di oranan, causando e fayecimento di mas o menos 1,500 persona. E restonan, descubri den aña 1985 ta mas o menos 3,800 meter bao awa y mas o menos 700 kilometer leu for di e costa di Canda.
Geffen a comenta cu imagennan anterior di Titanic tabata limita pa nivelnan abao di lus y solamente tabata permiti e persona mira un parti di e resto alabes. El a bisac u e modelo nobo 3D ta captura henter e restonan y ambos parti di e crucero, cual a separa na momento cu el a hundi, den detaye cla incluyendo e number di serie riba e propeller.
Investigadornan a pasa 7 luna ta procesa e gran cantidad di data cu nan a reuni y un documentario tocante e proyecto lo lansa proximo aña. Geffen tambe a splica cu e ta spera cu tecnologia nobo lo yuda e investigadornan por yega na e detayenan di con Titanic a hundi y permiti hende interactua cu historia di un manera nobo.
“Tur loke nos a asumi tocante con el a hundi y demas detayenan tocante Titanic ta bini for di speculacion, pa motibo cu no tin ningun modelo cu bo por reconstrui ni tampoco calcula e distancianan exacto,” el a splica. “Mi ta emociona pa motibo cu e calidad di e scan aki lo permiti hende den futuro por mira Titanic nan mes y mira unda e brug tabata y tur demas cosnan.”
Park Stephenson, e experto lider den Titanic cu tabata involucra den e proyecto a yama e model aki un “logro inmenso,” agregando cu e “ta mirando detayenan cu ningun di nos a yega di wak antes y e ta permiti mi por construi un bista di tur loke nos a siña te cu awe y mira e restonan den un bista nobo. Nos tin data real cu ingenieronan por usa pa examina e mecanica real di con e barco a kibra den dos, con el a hundi y asina yega hopi mas cerca di e storia berdadero di e desaster cu a pasa cu Titanic.”
