Buro Central di Estadistica, CBS tabata exitoso den su trabao pa ehecuta e conteo nacional di hende biba na Aruba den pandemia. E exito ta particularmente e hecho cu ningun di e contadonan cu a bishita cas a keda infecta. Y no tin indicacion cu e famianan cu a habri porta pa e contadonan di Censo 2020 a keda infecta. Asina Director adhunto di CBS, Desiree Helder a bisa Bon Dia Aruba.
“Normalmente ta tuma 10 dia pa ehecuta e conteo,” Helder a splica. “Pero mester a cambia e procedura pa motibo di e pandemia. E tabata un reto grandi, pasobra mester a tene cuenta cu e personanan encarga cu e conteo. P’esey a tuma mas tempo. Pero a logra e meta principal. Ningun di nos hendenan y e famianan cu nan a bishita a keda infecta cu e virus.”
Pero, e proceso tabatin su efecto si pa locual ta cataloga e ‘natelling,’ cu semper mester bin despues di e censo. Esaki lo sucede na maart venidero.
CBS a uza tres diferente metodologia pa toch logra ehecuta e conteo. A hiba un campaña digital y 30 porciento di respondentenan a haci uso di esaki. Tambe a bishita 1000 cas. Banda di e dos aspectonan aki, tambe a duna asistencia pa medio telefonico, pasobra “toch tabatin hende cu no por a yena e formularionan online. Locual falta awor ta esnan cu no a participa den e conteo inicial,” Helder a bisa Bon Dia Aruba
Pa fin di luna sinembargo, CBS lo duna e prome resultado di e conteo y ta premira cu e asina yama tabellenboek, esta tur e datonan, lo ta cla digitalmente pa luna di juni.
