Ayera a celebra e prome referendum di aña 2017 den departamento di Mediador di Gobierno. E referendum aki a wordo pidi pa sindicato FTA pa representa e trahadonan di Botica Eagle.
Despues di e contamento di voto deposita den e referendum aki, Mediador di Gobierno a declara na Bon Dia Aruba cu un total di 22 trahadonan di e botica menciona tabatin derecho di bay vota. Pero finalmente 18 trahado a bay vota, di nan 17 a vota na fabor di un representacion sindical y un no a vota pa niun sindicato. Considerando cu FTA a haya e mayoria di e voto, kiermen e mita plus un di e total di e trahadonan cu derecho di voto, e organisacion aki ta representa e trahadonan pa negosha nan prome contracto colectivo (CAO) cu e dunado di trabou kende nan tin tres botica den operacion.
E referendum aki a wordo convoca di 1or media te cu 3or y mey di atardi. E orario aki a wordo stipula debi cu tin dos grupo di trahado cu ta traha diferente warda. E trahadonan ta esun di assistentnan di e apotheker. Esaki ta e prome referendum celebra e aña aki, a pesar cu actualmente tin un peticion pa tres referendum mas ariba mesa di Mediador di Gobierno. Ainda nan ta den proceso si e referendum cu ainda ta pendiente lo continua. Ya cu ainda ta pendiente si e sindicato a cumpli of si nan tin tur e rekisitonan na ordo. Entre nan, si nan tin riba papel e mayoria di e trahadonan cu lo desea di bay den referendum.
Pues pa diabierna awor, Mediador di Gobierno mester sa si e otro referendum lo wordo celebra. Of di otro banda si e dunado di trabou ta reconoce e sindicato di biaha e ora un proces-verbaal lo wordo firma mesora.
