For di diferente fuente ta yegando e prome reaccionnan di parti di gobierno y di parlamento Hulandes. Den un reunion ayera di e Comision di Tweede Kamer pa Relacion di Reino unda secretario di estado pa Asunto di Reino, Raymond Knops, a duna splicacion, e asunto di e cambio di ley efectua pa Staten di Aruba recientemente a ser trata.
Segun e medio Koninkrijksrelaties.nu Knops lo a declara cu e ta anticipa cu e accion di parlamento Arubano pa kita supervision financiero independiente for di caminda por tin consecuencia negativo grandi pa Aruba. Esaki specialmente pa loke ta reputacion di Aruba riba mercado financiero internacional y cerca e ‘rating agencies’ internacional cu ta evalua credibilidad financiero di e pais.
Knops lo a hinca su palabranan den un formula bastante diplomatico, pero toch bastante cla, bisando cu e desmantelamento di e supervision financiero combina cu e debe publico hopi halto ta algo practicamente iresponsabel. E mandatario lo a bisa tambe cu e ta hopi preocupa y cu ultimo palabra den e asunto aki no ta bisa ainda.
Parlamentario pa VVD Andre Bosman lo a declara cu Aruba no ta mantene su mes na loke a palabra y hasta ta tilda gobierno di Aruba di mala boluntad. Practicamente, segun Bosman, no tin supervision financiero mas. Ademas e ta señala cu eliminacion di e supervision financiero, Aruba lo por bay den direccion di ‘junk status’ pa loke ta su baloracion internacional financiero.
Segun e portal Noticiacla, lo a tuma luga ayera un video conference entre ministro di finanzas di Aruba, Xiomara Ruiz-Maduro y secretario di estado Raymond Knops. Te na momento di ciere di edicion no tabatin noticia adicional riba esaki.
Nota di redaccion: Actualmente Aruba tin un rating di ‘BBB‘ cu ‘outlook’ negativo, tanto cerca Standard & Poor’s como Fitch Ratings. Ta considera un stap mas abao, esta ‘BB’, internacionalmente como ‘junk status’ cu consecuencia severo pa e prestamonan cu un pais por haya, y contra ki porcentahe. Den nan reportahe ambos agencia, como tambe IMF ta enfatisa semper e confiansa cu e supervision Hulandes ta representa den evaluacion di e situacion financiero di Aruba. Tambe mester tene na cuenta cu Aruba mester di aprobacion di gobierno di Reino pa por haya prestamo internacional.
