Prome promocion di programa Aruba Quality Seal: 14 compania a ricibi acreditacion mas nobo den industria turistico

Diaranson anochi, un grupo di 14 compania di nos sector turistico a ricibi nan respectivo acreditacion for di Oficina di Turismo Aruba (ATA) y e organo acreditado QESH Services.

Nan ta e prome promocion cu a sigui cu exito e programa aki y cu a ricibi e seyo di Aruba Quality Seal, cumpliendo debidamente cu tur nan exigencianan y normanan di calidad. E acontecimento aki ta uno importante pa nos principal fuente di economia, ya cu ta pone nos destino y producto turistico na otro nivel, compara cu otro competencianan den nos region

Importancia.
Directora di ATA, Ronella Tjin Asjoe-Croes ta considera e programa aki como uno di auditoria, y como ATA su directora, ta sinti su mes hopi orguyoso di su team, ya cu e ta un programa unico.

E ta un di e programa di acreditacion mas nobo den industria turistico. E tipo di programa aki ta conduci nos producto turistico na nivel macro di mehoramento y eleva e nivel di calidad di nos destinacion. “Esaki ta e tipo di esfuersonan cu por yuda bo. Ademas cu lo yuda Aruba como destino pa sigui mehora locual ta bon caba. Pero sigur contraresta y resolve e problemanan cu ta existi,” directora di ATA a bisa na Bon Dia Aruba.

Tjin Asjoe-Croes a bisa cu Aruba su turismo tin un nivel di satisfaccion halto bou nos bishitantenan. Te cu luna di augustus 2019, ATA a colecta 6.028 encuesta na aeropuerto, caminda un 82% di e bishitantenan a bisa cu nan ta hopi satisfecho cu nan experiencia. E ta sigur cu como Aruba nos por a yega na e nivel aki, pasobra nos tin hopi atencion na locual nos ta ofrece, door di sigui desaroya nivelnan di calidad pa sigui mehora e producto Aruba. E ta sigura cu nos mester keda den e afan di desaroyo aki.

“Nos no por keda keto. Competencia ta hopi fuerte. Tin hopi inversion y tin hopi productonan nobo. Te hasta tin otro nivel di servicio cu kisas por surpasa locual Aruba ta ofrece caba,” el a expresa. Pero e ta haya cu nos mester keda para pa e nivel di servicio cu nos ta ofrece. Igualmente pa medio di esfuerso manera e programa di certificacion di Aruba Quality Seal, nos por ta dos paso mas dilanti cu otro destinacionnan cu no tin e programa aki implementa ainda. Esey ta pone Aruba su industria turistico na nivel cu ta mas eleva cu otronan.

Si nos no haci esey, ‘nos ta perde ora cu nos ta bay midi nos mes contra competencia cu si ta sigui move tambe,’ el a indica. Cu confiansa, directora di ATA ta agrega cu Aruba tin bentaha caba, ya cu manera e encuesta ta mustra: Un 82% ta satisfecho. Pues nos no tin un problema real, pero si tin cierto problema den diferente area. Un area cu el a menciona ta e balor pa bo placa.

Programa.
Tin diferente criterio cu ta inclui den e programa cu por brinda e consumidor, tanto local como internacional, e siguransa cu ora bo ta bishita un negoshi cu tin e seyo di Aruba Quality Seal, bo ta conta cu operacionnan na nan luga, higiena, manual di aspecto di siguridad y tambe na nivel di servicio.

Cu e certificacion aki e nivel di servicio ta uno excelente. Pero tambe e programa aki ta inclui aspectonan di medio ambiente. “Nos a haci uzo y tene cuenta cu locual a funciona pa otronan. Y tene cuenta cu locual ta importante mas y mas pa e consumidor,” Tjin Asjoe-Croes a declara na e matutino aki.

Como ATA nan tin diferente programa cu nan ta ofrece dirigi riba nan socionan cu ta provee oportunidad pa nan mehora nan servicio. Nan ta desaroya y ofrece e tipo di programa aki na un prijs accesibel, sigurando cu e nivel di e programa ta locual nos industria turistico mester y siguiendo tur e tendencia nan mundial.

“E ta un programa unico. Nos como ATA ta brinda esaki na un escala grandi di nos socionan,” el a bisa. E programa aki ATA ta ofrece conhuntamente cu su socio QESH Services. Tjin Asjoe-Croes a bisa cu QESH Services ta un firma di auditoria cu mas cu 25 aña di experiencia den e tereno aki.

ATA tin otro programa di entrenamento cu nan ta ofrece, manera Aruba Certification Program. E interes t’ey ainda den nos sector turistico pa e programa aki. Aruba Quality Seal a bira nan di dos programa, cu ta uno di auditoria cu -segun directora di ATA- lo yuda nan socionan local pa mehora unda mester mehora, y sigura cu nan tin e nivelnan di servicio cu e consumidor ta spera. Pero tambe eleva nan propio nivel di servicio.

Aunke e ta un programa exigente, e ta uno tambe factibel pa e compania por pasa door di e proceso aki, ya sea cu bo tin un negoshi chikito, mediano of grandi, e ta alcansabel. ATA ta bay sigura cu e consumidornan local y internacional por sa kico e seyo di Aruba Quality Seal ta para pe, y cual ta e negoshinan cu ta carga e cello aki.