Fundacion Basha hunto cu Vibration PR Co. a organisa nan prome Poetry Night ‘Star Gazer’ pa 2017. Esaki tabata un anochi spectacular na Seroe Colorado Lighthouse bou di e streyanan yena cu poesia, arte, spoken word y musica.
“Nos ta busca localidadnan cu tin mester di promocion of desaroyo cual ta di balor social y cultural,” Maria Silva di Vibration PR Co ta bisa. Sra. Silva ta bisa cu pasobra nan no a logra organisa un evento di poesia aña pasa pariba di brug, nan a dicidi pa cuminsa cu e prome evento di aña na San Nicolas. “Nos a pues cuminsa na e punto final na Seroe Colorado cual tabata un localidad sumamente bunita pa esnan cu nunca a yega di wak algo asina, e tabata e localidad perfecto.”
Mas localidad unico
E aña aki ta bay continua di busca localidadnan unico pa organisa e evento di Poetry Night pa sigui stimula inspiracion den comunidad. E siguiente Poetry Night ta bay ta cerca di aeropuerto Reina Beatrix cerca di e lama. Pa haya sa e localidad exacto cual lo divulga pronto, mester sigui e pagina di Facebook di Vibration PR Co. “E inspiracion tras di e siguiente lo ta e storianan di nos piscadornan.” Sra. Silva ta conta cu e aña aki nan ta bay introduci algo nobo cual ta Poetry Night pa muchanan. Esaki lo ta un edicion special di e evento aki cual lo tuma luga na bahada di solo riba diferente localidadnan manera Casibari. “Nos ta habri tambe na sugerencia di comunidad na localidadnan cu nan ta pensa lo ta importante y ideal pa organisa un anochi di poesia,” e ta bisa.
Hopi talento
Presente tabata hopi di e poetanan cu semper a bay Poetry Night pa hopi aña. Angelle Stamper cu recientemente a publica su coleccion di poesia aki na Aruba titula “Cicatriz di Mirada” tambe a bay presenta su poemanan. Definitivamente hopi talento ta bay presenta na e evento aki aña tras di aña. Un di e poetanan, escritor y artista cu semper a apoya e iniciativa aki, conoci manera “Beach Lama” ta conta Bon Dia Aruba cu: “Nos ta hopi contento cu e acogida y e publico pa locual tabata e prome Poetry Night di aña. Tabata tin varios hende nobo cu a presenta y te hasta un presentacion chikito di Taoist Tai Chi Society. E tabata hopi bon, chilly night anto e airco tabata riba maximo!”
Foto: Anuar Habibe
