(AP) – Oficialnan di salud federal a aproba e prome pildo pa trata specificamente depresion severo despues di parto, un condicion cu ta afecta miles di mamanan nobo na Merca cada aña.
Food and Drug Administration (FDA) riba diabierna a otorga aprobacin di e droga, Zurzuvae, pa adultonan cu ta experiencia depresion severo relaciona cu parto of embaraso. E pildo ta ser tuma un biaha pa dia pa 14 dia.
“Tin acceso na un medicamento oral lo ta un opcion cu ta beneficia varios di e muhenan aki cu ta lidia cu e sentimentonan fuerte, extremo y cu hopi biaha ta pone nan bida den peliger,” Dr. Tiffany Farchione, FDA su director di medicamentonan psikiatrico a comenta.
Depresion despues di parto ta afecta mas o menos 400,000 persona pa aña y mientras hopi biaha esaki ta kita su so dentro di algun siman, e por continua pa lunanan largo y te hasta añanan largo. Tratamento standard ta inclui terapia y pildonan anti-depresion, cual por tuma simannan largo pa traha y no ta yuda tur hende.
E pildo nobo aki ta di Sage Therapeutics, cual tin un medicamento similar caba cu ta ser duna via inyeccion durante 3 dia den un facilidad medico. FDA a aproba esaki den aña 2019, aunke no ta usa esaki hopi a causa di su prijs halto y e logistica necesario pa por duna e tratamento aki.
FDA su aprobacion di e pildo aki ta basa riba estudio di 2 compania unda a demostra cu e muhenan cu a bebe Zurzuvae tabatin menos señal di depresion durante un periodi di 4 pa 6 siman ora di compara nan cu e personanan cu a ricibi un pildo di control. A midi e beneficio di e medicamento aki pa medio di un test psikiatrico, y a mira e beneficio dentro di 3 dia pa varios di e pashentnan.
Dr. Kimberly Yonkers di Yale University a bisa cu Zurzuvae su efecto ta “fuerte” y cu e medicamento posiblemente lo ser duna na muhenan cu no responde bon na pildonan anti-depresion. E no tabata involucra den e testnan di e medicamento nobo. Sinembargo, el a bisa si cu FDA mester a rekeri Sage pa entrega mas estudio cu data despues di e estudionan ehecuta, pa asina por evalua con e muhenan a sigui despues di varios luna. “E problema ta cu nos no sa kico ta pasa despues di 45 dia,” Yonkers a comenta, un psikiatria ken ta specialisa den depresion despues di parto.
Sage te ainda no a anuncia e prijs di e pildo aki, y Yonkers a comenta cu esaki probablemente lo ta un factor clave den con ampliamento lo receta esaki. E efectonan secundario di e medicamento aki tambe ta menos leve cu e version duna via inyeccion, y ta inclui mareo y soño.
Sage a desaroya e medicamento aki cu e compania di farmaceutico cu tambe na Massachusetts yama Biogen.
